Flamingo

嗰晚啱啱考完游水教練牌，同阿Jack食手工意粉慶祝，返到去就接到細路電話，細路話可唔可以傾一陣？嗰一刻，阿翹就知一定同佢老婆有關。阿翹有一種超能力，一眼就睇得出個女人愛唔愛嗰個男人。 每次行喺街度，喺餐廳，飛機上面或者商場裡面，望住一對對男女，一個個家庭，佢就好奇呢個世界上到底係咪真係有「幸福」呢樣嘢？感情只係咁啱一個算係合適嘅人，婚姻都只喺搵個人過日辰。維持生活需要嘅就係笠懦。阿媽細個成日話「傻人有傻福」，佢從30歲就一直扮傻，扮到老竇過身為止，喺喪禮上面，佢仲安慰嗰個喊得好慘嘅女人，即使明知佢就係老公個二奶。或者細佬就係遺傳咗阿媽呢方面。佢記得，擺酒嗰晚，佢仲笑口噬噬同佢個老婆班EX一齊合照。好多人都背後笑佢成個頭都喺綠色。呢次佢哋傾偈同上一次細佬主動打嚟同佢呻嘅嘢一模一樣。嗰次係佢哋簽字前一晚，細路老婆同細路坦白，嗰幾年其實自己一直有同一個同事保持不正常關係，但佢應承結咗婚之後，會同嗰個同事斷絕來往，一齊好好照顧肚入面嗰B。之後竟然佢哋都相安無事，不過阿翹估到遲早都會出事，佢知呢個女人養唔熟。

Jack Whatsapp過嚟問佢「Save home」未。呢個男人喺幾貼心，不過唔知咩都俾晒佢之後，佢仲會唔會咁。細個返鄉下，阿翹覺得最開心嘅一件事就係啃蔗，咬落去嗰啖，鮮甜嘅蔗汁噴射入口。大個咗佢發現，男人同啃蔗一樣，先甜後渣。一邊搵表情圖案覆，一邊聽細路呻，同時望住Netfliex最新上線嘅《魷魚遊戲》第二季，佢已經唔喺好記得之前啲劇情，上季雖然俾人吹到上天，但其實佢覺得唔係好好睇，但個個都睇，你唔睇，返到Office，就應唔到機，就慢慢會俾人排擠，跟住俾人杯。阿翹曾經係個好獨立嘅人，但係隨着年紀慢慢大，佢越嚟越覺得自己需要「朋友」，需要一個穩定嘅「圈子」，需要熱鬧，如果唔係佢就會剩返孤獨，呢個世上可能唯一嘅真實之處。

傾到十二點半，細佬終於收線，阿翹唞咗啖大氣，將AirPod從耳仔入面拎出嚟，擺落盒到冲電。沖涼嗰陣，佢冇繼續諗細佬單嘢，其實佢唔係好關心，佢同細佬一年先見兩三次，細個嗰時佢哋唔啱牙，成日嗌交，到阿翹讀大學嗰幾年，佢哋變到面阻阻，差不多完全冇講過嘢，要等到阿爸過咗身，佢哋先好似意思到原來佢哋係「姐弟」，系家人。家人喺一種責任。扭實水龍頭，放啲頭髮落嚟，打開窗，同風一齊吃一支煙，到底啱啱，啲水打到面上面嗰時，佢諗緊啲咩？對面窗入邊，一對情侶熄咗燈，任由電視螢幕嘅光不斷吸走佢哋面上嘅表情。近在咫尺總喺帶著危險。跟住煙溜走嘅方向，阿翹見到中環無數嘅塔尖爭分奪秒咁伸入細如井口嘅天空，將夜晚變到白熠一般。

*

行過間新開嘅麵包店，聽講係邊間五星級酒店甜品主廚廚師出嚟開，最近喺IG同小紅書上面都好紅，#好似去咗巴黎嘅中環牛角包 有成萬個。阿翹扮到同班師奶同事一樣好興奮，排咗十五分鐘，每人買咗件扁踢踢嘅牛角包同埋一件蛋糕，出個story，盛惠一舊水。中環每個月至少都新開兩間類似嘅嘢，同拉麵一樣，大多數呢啲鋪頭，頭一個月人滿為患，第二個月就拍晒烏蠅，半年後圍起重新裝修過，改個名，一切又重新嚟過，周而復始。喺呢度，所有新鮮事物都只喺虛有其表，咖啡機不停榨取，港灣不停泥石俱下。呢度永遠乾涸。

襯老細出去陪客，班同事竄入pantry，阿翹見狀，即喺擺低手機，跟埋去。佢哋一邊繼續講阿邊個邊個嘅八卦，一邊互相掠其他人件cake嚟吃「都係你呢件好食啲，早知買呢件啦。」，阿翹個件Tiramisu，自己淨係食咗兩啖，不過都好，佢減緊肥。阿翹細個喺肥底，雖然未至於飲水都肥，不過只要飲食一唔控制小小，塊面就會開始脹，每次影完相，P圖要P好耐。

最近有個friend教佢用一款AI，一秒都唔洗就變V面，佢用咗幾次，硬喺覺得有啲怪怪地，現實邊有咁順攤，每當你生安白造時，就會唔聚財。反埋位，office一下靜咗落嚟，呢個大概十分鐘至最多半小時嘅時間，喺每日難得嘅奇蹟，你可以專注喺自身以之外，又與身邊人無關嘅事情之上，一種彷似自由嘅感覺，如同坐喺廁格入面碌手機一樣。

Jack話今日帶佢去吃日本嘢，阿翹特登喺廁所補咗好耐妝，但落到樓，都喺要企。皇后大道中一到放工時間就會大塞車，喇叭就算再大聲，車龍都喺紋風不動，幾百萬嘅法拉利同一千萬嘅勞斯萊斯都毫無用武之地。閂門，攬上安全帶，喺最後一道陽光閃人之前，阿翹趕上咗呢條「龍」。Jack例牌問佢今日返工攰唔攰，阿翹話有個客好煩，Jack無追問落去個客點樣煩，可能佢等緊阿翹自己講，又或者，其實佢根本唔關心，佢雙手握住軚盤，雙眼望住前方，佢想搵一條捷徑，搵某一個可以轉彎嘅路口，俾佢擺脫前面無數盞紅色嘅車燈。

間嘢阿翹其實之前吃過，不過佢無講。呢幾年，佢唔再同新識嘅人講自己嘅過去。只要唔講，就可以當無發生過，除非有咗小朋友，不過你可以選擇唔問，就好似佢對Jack緊。當車駛入隊道嘅短暫一刻，你可以喺車窗上面見到自己同埋隔離嗰位，佢知道自己唔愛Jack。但佢摸唔清Jack點諗，條友喺WhatsApp同IG上面好鬼窩心，幾乎秒覆，把嘴又甜，成日噓寒問暖，但出到嚟又成碌木，無乜嘢講，餐餐飯「好唔好食」「幾好」之後，就喺你眼望我眼。如果擺著五年前，阿翹一早搵咗第二個，但而家，佢知道Jack可能喺佢最好嘅機會。三十歲之後，街上面真正嘅筍盤九成九俾人私有化咗，想搵個可靠嘅三十幾女人想唔同啲有夫之婦糾纏，就唯有硬吃有少少參差嘅，無計，鬼叫你遇人不淑，無英年早婚。

返到上環，阿翹落車前問Jack上唔上嚟飲杯茶。Jack話要趕返屋企睇個女，下次。喺樓梯嘅暗位聽住車聲漸遠，阿翹行返出馬路，今日喺TGIF，佢唔想咁早自己一個。佢向住公司嘅方向行，細個佢阿媽就同佢講邊個邊個女喺中環返工，識咗邊個邊個個仔，由東頭頓搬左去貝沙灣定半山，䟴䟴腳做少奶奶。好似只要嚟到呢個地方，生活就會變得容易，就可以擺脫原本嘅出身，改頭換面。

上蘭桂坊，要行一段斜路，沿途啲十幾歲嘅「口靚」妹著到好似無著咁，個胸同個囉爭住要跌出來，個妝就狠到你以為今晚又喺萬聖節。喺舞池中央，佢哋扭到好似荒島海邊遇難者求救嘅篝火。望住後生嘅自己，阿翹唔知應該羨慕定好笑。到而家佢依然有種感覺，只有在池中熱舞，只有成為「火」，人先可以互相接近，只有喺呢度，人同人之間嘅「AT力場」先會解除，喺呢度你可以同任何一個人濕吻，無需認識、食飯、散步。也許愛只是一處場域，愛喺「火」，每一個深陷愛情嘅女人都喺度燃燒。而年輕生嘅女人越容易縱身，歲月是灰燼，她是最後的餘溫。

露宿者與捨荒者將洞扯大如天。黑暗中，玻璃可以彷似不存在，所以潛入深夜的中環可以喺一片荒野，佈滿無形的牆。那些尚在OT的方格是逃出去唯有的指示。但無人想逃。

插上充電線去冲涼，包住頭出嚟，有N條WhatsApp，「我啱啱返到去瞓着咗。」，阿翹咁樣覆。食支煙，俾平時校細一檔吹頭，唔想嘈親人。喺半濕半乾，阿翹諗起一個中學同學，佢中四開始同一個男仔拍拖，兩個人好似糖黐豆，上到大學，男仔有時會話個女仔煩，大學畢業之後，男仔同佢老竇一樣入咗消防，有次出去玩，唔小心搞大咗人哋個肚，為咗責任，同一齊十年嘅女朋友分手，娶咗個之前淨係見幾三次嘅「靚」妹。有一個畫面阿翹好記得，幾個人一齊坐車去某個地方，個女仔打另一個朋友電話，話要搵個男仔，朋友遞俾男仔，男仔一野掉咗部手機。

*

個扁踢踢嘅牛角包好油好甜，不過送咖啡就啱啱好。重新睇一次《魷魚遊戲2》第一集，之前都唔知睇咗啲乜，但望咗半個鐘之後，佢撳咗暫停，開始碌手機，佢覺得睇住大螢幕好費神費力，只有碌手機嗰陣阿翹先覺得放鬆舒服。某一日佢發現，螢幕入面拖泥帶水嘅劇情依牙鬆弶個樣好似威脅，好似要控制住佢，所以阿翹唔鍾意睇電視劇。一旦被攝錄機框住，所有嘢都變得虛假，越係虛假嘅嘢，就會越搏命咁嬌柔做作，去表演自己，只要意識到眼睛同歷史，佢就失去咗自由。記憶使人渺小。

敷mask嗰陣，阿翹瞓着咗。素顏，帶頂cap帽，加副黑超，落樓下café再飲杯咖啡。耷低個頭個，幾似明星。週未好多男女喺café拍拖或者相互了解當中。大多數時候，男方都喺更主動，更殷勤，更焦慮嘅一方，因為佢哋嘅快樂雖然簡單，但又太過短暫，佢哋喺一種活喺重複再重複當中嘅動物，佢哋製造咗一個同樣趕頭趕命嘅世界。陽光從某道窗上面反射到每架行過嘅車，就好似閃光燈。

本身想去ifc行下，睇下Chanel 最新個包包，但個身完全唔想郁，坐到腳痺。個friend話自己發燒，本身諗住cancel 個gathering，但另一個話一定要面對面講出嚟先會舒服，阿翹就無所謂，如果病咗，就當喺Jack嘅最後測試。同Mary喺七仔一齊買咗啲零食同一支紅酒上去。入到屋Mary話支酒喺佢老公啲客送。

幾個月無聚，大家先交待下近况，阿翹終於考到游水教練牌，完成夢想。Mary終於搵到新工，雖然喺翻舊公司，但人工加咗唔少。阿翹同Linda都好奇以前啲同事而家過成點。「都喺咁，老咗囉。」。支酒飲到一半，大家開始有feel，喺一次冷場之後，正式進入正題。Mary呻老公無上進心，收工就掛住打機，碗又唔洗，地又唔拖，當佢工人，問佢咩，唔係一問三不知，就係攤大手板，好似頭家同佢冇關係。佢個保險經紀知佢唔開心，佢每個story都覆，有日佢哋吃完飯，就去咗開房。下個月佢哋會一齊去北海道。

「咁你點Jack？」大家笑。

阿翹講到佢帶食好西，又送佢Prada耳環，去邊同咩人見面都會同佢報到。

「喺無咩嘢講，佢個人有小小悶。」

「悶嘅男人唔會沙沙滾。」

「唔一定㗎，男人喺用下面，唔喺上面諗野。」

「長期飯票嚟講Jack都算高質㗎啦。」

輪到Linda ，都係講嗰個男人。佢哋最近少咗嗌交，話佢最近開始玩交友app，個男人都鼓勵佢去搵屬於佢自己嘅真愛。

「咁我哋呢十年算係咩？」

喊咗外賣，阿翹留意到有個新miffy公仔。兩年前佢同班大學同學十年之約一齊去咗荷蘭同比利時，佢喺Magritte個博物館撞到Linda同佢嗰個男人，佢哋想睇The Lovers，但員工話個幅畫係紐約。佢哋手上面帶住一對喺跳蚤市場買嘅手環。

部lift咿咿哦哦咁搖落去，彷似喺屋入面大家最後欲言又止喺自己心入面打滾嘅聲音。

*

Call Uber 過海，喺隧道入面無車會爬頭，大家都安步就班前進。

細佬唔想飲酒，亦唔想去多人嘅地方，兩姐弟行咗入細個成日嚟嘅九龍公園。企喺買新地同麥旋風嘅麥當勞屋仔前面，阿翹聽住細佬重覆幾日喺電話入面重覆嘅內容，佢抬起頭望住酒店、商場同寫字樓。身前，右手邊有一個《閃靈》入面迷宮嘅縮細版，佢曾經好驚走入去。左手邊喺一條冇乜人知，通向港口嘅小路，大多數人只會停留喺鳥湖。佢曾經問過老竇，點解嗰啲紅色嘅雀仔唔飛走，老竇話因為呢度好食好住。

「咁點解佢哋連飛都肯唔飛？」。

細佬講講吓，突然話要去接老婆。原來佢老婆出軌嘅喺結婚前嘅同一個人。

「點解你要搞到自己咁賤？」

「如果唔愛佢，我就咩都冇。」

今日阿翹第二次聽到呢句說話

經過泳池時，細佬問阿翹記唔記得細細個時，老竇喺呢度教佢哋游水，阿翹記得。