焊
南哥用魚骨撩緊牙嘅時候，阿成同佢講，晏晝自己有個親戚過嚟，叫佢幫手帶一帶。電視度，第一場馬啱啱跑完，茶餐廳裡面，大家都「X」一聲。
喺「七仔」嘆多一陣冷氣，拎住罐青島，喺門口食埋支煙。見唔到「黑仔」。笠返個死人頭盔，爬兩層樓梯，繼續搵命博。34度，個新人乜柒都唔識，佢自己一邊燒，仲要一邊教，南哥都唔知自己到底流咗幾多汗，佢覺得個人似個天氣咁濕滯。
上樓前，南哥例牌喺屋邨一張有路燈照到嘅凳上面吃包花生，飲多罐「藍妹」，碌陣手機。自從阿仔幫佢「down佬」左「飛士仆」，教佢喺上面睇片之後，南哥就開始日日睇啲貓貓片。幾個見慣見熟嘅麻甩佬有時會離遠嗲兩句：「乜今日咁遲啊。」
返到屋企第一件事係沖涼，唔係老婆又要話佢臭。除衫嘅時候，手愈嚟愈難舉起，搞到佢成個傻仔咁樣。當凍水淋到硬倔倔嘅身體，就好似將啱啱砌完沙雕嘅手浸入海水。佢突然醒起，成家人已經好耐無去過海灘，不過喺抹乾身之前，呢件事，已經隨住啲灰白嘅頭髮，一齊衝左落水渠。
一嚿石咁坐低，老婆響廚房趕出嚟，舀一碗熱湯，每一日，只有當南哥飲呢碗湯嘅時候，佢先會發覺自己呢一日嘅攰。
「聽日同玲姐食飯唔好又成碌木咁樁喺度。」
老婆一邊講一邊擺低前日食剩嘅叉燒。
「衰仔出嚟食飯！」
半夜南哥又俾自己嘅鼻鼾聲嘈醒，當佢擘開眼望住溶溶爛爛嘅天花，佢可以清楚聽到自己郁唔到嘅身體裡面，傳嚟，細個嗰場，成個山頭火燭個陣，立立（歷歷）亂，嘅銅，鑼聲。
「要買樓就要快啲啦，而家樓價愈升愈快。」
「你知我老公好鍾意而家東頭邨間望到海嘅公屋。」
老婆尋求認同咁望一望老公。
南哥「哦」左一聲。
「望到海嘅私家樓，我哋真心買唔起。阿南依家就話忙，搵到啲錢，但世事好難講㗎嘛，如果過兩年少咗嘢做⋯⋯同埋你知我哋個衰仔成績唔掂，咁要準備筆錢俾佢外國讀書。」
南哥望住張點心紙，諗緊嗰個「 」字到底點讀。
從褲袋攞疊錢出嚟埋單，嗰個收銀望咗兩眼南哥啲黑鼆鼆嘅手指，嗰下，佢差啲想發火，但，唉，算，老婆個朋友喺後面
住。啲人生著對狗眼喺額頭，由佢。
從酒樓出嚟，南哥一支公行去小巴站等車。雖然有啲人撐遮，有啲人帶黑超，但佢其實無覺得個天咁光猛，佢只係覺得些少熱。可能因為未飲酒，佢有少少吽豆（怐愗）。每每呢個時候，佢會去留意周圍，好矇嘅樓、好散嘅人、好細聲嘅街。佢隱隱約約聽到：
「廿蚊三個！又大又甜。」
唔知係太耐冇去過街市定點，喺南哥嘅記憶度，橙仲喺十蚊三個。
司機換左幾次波，兜咗幾個圈，所有人都喺醫院急症室門口落車。轉兩次
，行過黑鼆鼆嘅走廊，南哥喺病房見到甩皮甩骨到，差啲認唔到嘅老母。
「啲藥冇用㗎。」
本身好好地嘅老人家，見到自己個仔嚟，即刻變得炆憎（䒐䒏）。
「啲醫生啦，過嚟望你兩眼，問兩句，簽個名就走，根本就無心醫你。」
老人家發蹄騰咁想要落床，南哥嗱嗱聲擺低個橙，擓實佢。
人老左，係咪就一定會變得long lai（狼戾）？
「我要去廁所啊。」
「阿娟你又想點呀？」
姑娘過嚟問。
扭擰（忸怩）咗一陣，阿娟又話唔落床啦，叫人唔好理佢。
等姑娘走咗，阿娟話
「報應。」
南哥又坐翻低。
「報應嚟。」
搣開個橙之後，南哥就聞阿娟身上面個䘲有嘢燒燶咗嘅馟。
「怪我當年冇好好照顧你哋，而家你阿哥同細妹都移咗民，電話都冇一個，報應嚟㗎。」
南哥搣咗一嚿橙比阿娟。
「但我想嘅咩，你老竇行船，半年先返一次屋企。」
係咪一定要喺人老咗之後，而唔係當時，我哋先會發覺生活係咁澩嫪。
「乜鬼甜橙，酸嘅，依家出邊咩都係呃人。」
如果老母唔係病咗，依家南哥應該釣緊魚，或者喺馬場飲緊啤酒。佢突然間醒起，細個同老母一齊坐嘩啦嘩啦過海去灣仔，嗰度有座天后廟。嗰時個海好闊，風好大。
「睇實你個老婆呀。」
南哥見到阿娟嘴角嘅口水，好似錫料。
臨走前，阿娟靡靡摩摩唔知邊度拎咗封利是出嚟。
「你下禮拜生日。」
小巴喺紅燈前停低，飛機喺屋頂同樹葉之間飛過，南哥諗交通工具縮短咗呢個世界嘅距離，如果世界喺一個人，呢個人個身體，響小巴、火車、飛機、電視、電郵、手機嘅嘈喧巴閉度，同佢老母一樣，回晒塘。
落翻市區，差唔多天黑，喺七仔拎咗支孖蒸，南哥今日想飲啲勍嘅野。行過報紙檔，佢䁽到份《龍虎豹》，想買，但，唉，都係算啦。路邊搵個垃圾桶，問個後生借個火，望住啲趕返屋企嘅人影越嚟越長，聽住車尾燈時唔時響，綠燈開始閃，有啲嘢開始變慢。一啖煙，一啖酒，南哥知道，人生難得自由。
翻到屋企，阿仔霸住部電視打機，老婆一邊煮緊飯，一邊話佢好臭，叫佢快啲沖涼。吃完飯，南哥驚驚青青咁㩒手機，想搵首鄧麗君嘅歌聽吓，佢唔敢叫個仔，唔係一陣兩父子又要嘈交。夜晚，瞓喺床度，老婆提起玲姐講買樓嘅事。
「聽講去澳洲讀嘅話，一年廿萬就夠。」
第二日起身，南哥覺得比平日仲攰，每次休息完都係咁。茶餐廳吃完個常餐A，飲埋個無落糖嘅熱鴛鴦，再買罐嘉士佰。今日終於又見到「黑仔」，但隻貓好似唔識佢，衝咗上樹。
「阿成個親戚呢，又話要搵錢結婚，今日唔返啦？」
「好大件事呀，你知唔知。」
「搞邊科？」
「條友尋日返工嗰陣，唔用個罩，另外啲人話佢啦，佢話遮住咗睇唔清楚。」
「嘩咁好大件事喎。」
「係呀，收工嗰時，佢成隻眼紅x晒，啲眼淚飛哩啡呢係咁流。」
笠頭盔，擸架生，爬樓梯。南哥記不起嗰個靚仔個樣，其實咁樣仲好，自己可以好快唔記得咗呢件事。今日天氣好好，無一個人可以見到自己個影。南哥踎低，拎起面罩，所有嘢變成純白色，好似呢個世界就嚟要穿綳。
