市井之內有清泉：《為光音作證——潘源良香港誌記》

執筆前有緣拜讀《為光音作證——潘源良香港誌記》一書，一揭難擱，差少少連本稿都過埋死線，無他，潘San，一位前輩加老友加酒腳加老師（師是偷的，佢唔知但我會認），可以再八卦佢背景同創作心法，平時大家飲醉斷片節錄終於可以有文字紀錄，吹水局起碼有個對證，下次見面又可以借此書天南地北，快哉。

潘源良乃元祖MK仔（佢真係親眼見過通菜街有人耕田），自細吸收香港街頭文化，經佢講出年輕時行廟街女人街，聽粵劇、流行口水廣東歌丶歐西流行曲，又遊走各大戲院睇中外新舊電影，再去當時二樓書局狂刨中西文學，然後搖身入中大少林寺，出返嚟社會變咗個多功能文青。要留意七十年代係並未有「MK」丶「文青」等標籤，佢仲要將兩者結合，市井之內有清泉，呢啲先係真正香港流行文化奶水，抽離返啲睇，係七十至九十年代初先會孕育呢類人物同事物，就好似酒一樣，某年份嘅天氣地理同環境先會撞出獨特收成一樣。

阿潘由八十年代活躍至今，整整四十年，電台電視電影，填詞編劇導演，舞台音樂騷，講波又踢波，同時又識書法開展覽，出嚟同你正經又得搞鬼又得，對後輩會關心扶持，奇人也。

做開文字同文化創作，點都要有本字典跟身，學下心法偷兩招出嚟行都要，呢個擺明係直入式廣告（如潘氏大叫：入咗一定入咗），稿費，我會請阿潘飲酒食飯，佢一定醉，我保證。

（轉載自《藝文青》2022 年一月號）

購書LINK：hkliteraturehouse.org/shop/jlrpk5sn97k3tesp3hgwtkgye7pe57