【粵語文學期刊】「風吹皇帝褲」下的官話和香港文學

（ 承蒙作者轉載，題為編輯所擬）

早前，分享過一本粵語刊物《迴響》，我覺得幾開心架，又多本刊物睇下。香港文學最好百花齊放啦。過幾日，有位記者朋友問我，薇婷（係囉，佢真係叫我薇婷而唔係阿包），你有冇留意粵語文學？我話有啊，因為博士論文第一章就研究清末香港文學刊物《中外小說林》，咁就有睇過少少粵語文學既討論。然後，傾開我就推介左《字花》第49期「你講乜話？towards a Cantophone Literature」，以及覺得李婉薇本著作真係重要既粵語文學研究，就又介紹埋俾佢。再過一日，個記者寫既一篇介紹文就出爐，登左係日月神報。點知，就開始有人批評呢本刊物，而刊物當然都不示弱啦，還口囉咩啊。然後你一言我一語，已經離開好遠。其實，一來本刊物又未面世，岩岩起步，等子彈飛一會兒，有咩問題呢？二來，點解到宜家仲要設立純文學呢啲稻草人呢？

「不純」的華語語系

係到我反而想講下Towards a Cantophone Literature呢個副題——呢個連《字花》最新係別字出既簡介文都唔講既副題。唔知點解大家見到粵語定廣東話就飛晒埋去講，介紹下香港既文學作品入面曾經有用粵語啊、有寫粵語啊。其實第49期《字花》，以我淺見，係對應華語語系研究既一期。華語語系係咩呢？就係處理各種Phone（音調、口音），說明就算大家都運用一套漢字書寫，也因應華人在不同地方落地生根，經「本地化」後也會衍生不同的口音，所以沒有一套純粹的華語。與其係已有既文學入面分析班作家用左幾多成所謂書面語，同幾多成所謂粵語，又或者係已有既文學入面同大家講返有幾鐘意用粵語，不如觀望返語言運用既理論大背景。華語語系強調一套漢字，都會因為不同的地方語受地方在地化影響而出現不純的狀態，咁點解你地唔講下香港既所謂書面語，究竟有冇在地化既過程？呢種在地化，又同所謂《國語大詞典》入面既官方書面語有咩分別？咁你答唔答得出點解我唔可以係學術論文入面寫「正正係」，而要寫「正是」、「恰巧相反」？與此同時，香港就係得廣東話？唔係嘛？咁《烈女圖》啊、《烈佬傳》入面既客家話又點計？點解你唔講下蜑家語？即係，我係西貢買魚，長期聽唔明佢地講咩個種蜑家語啊，究竟邊個本土啲？我估我係佢地蜑家船面前，雖然我企係陸地而佢係海面，佢一定覺得佢條船本土啲。我以為第49期，要講既係香港作為華語語系既一員，究竟有冇得諗；同時又想向華語語系發問，更細既土語、方言群體，究竟可唔可以係華語語系入面佔一席位？定係理論根本無法包括？咁大一個理論背景，如果大家明白個華語語系一直以黎在內地幾近無討論既原因，其實比起專題入面介紹香港文學有咩粵語作品，更加珍貴。即係，華語語系因為討論語言之「不純」，而往往被視為一種挑戰1949後中國共產黨統一語言下的普通話的理論。

廢墟探索者「香港隅地」：探索／保育兩難全？

與此同時，唔知係咪之前光榮冰室討論中，講過普通話有其作為官語既權力位置，於是，大家就急急腳，將書面話都貼埋落「官語」入面。甚至白話文又係官語，總之唔係廣東話就肯肯定係官語啦除非唔係。我本人都真係才疏又學淺，唯有查下書。「白話」一詞，其實唔係講緊我地教科書入面既「書面語」。基本上，粵語，本來就是粵語使用區既語言通稱，而同時又因為粵區地方廣大，本身都有好多唔同既口音，於是乎，就有一種較為通用既粵區「白話」，由廣東廣西既粵語作為共通。「白話」係清末而言其實係解為同文言文唔同既地方通用語，即係「淺白既語言」。好似我研究個本《粵東小說林》、《中外小說林》咁，有一欄目名係「白話」，但白話其實竟然係粵語黎，主要係因為佢係廣東發刊，再到香港復刊，所以對於主事者而言，「白話文」就粵語文。

現代文學及官方的統識

最後，到我地所知道既「現代文學」，其實就並唔係1949年後既官語既文學。如果你睇返早期（1900年至1920年間）既報紙，你會發現，成班報人係用文言定語體文上成日爭黎爭去。啊，咁即係點呢？其實就係一班人想係文言文以外，將文學解放予俾大眾，於是就通通想去搞一啲大眾可讀讀既語體文。1919之後，有班文學人覺得，啊，我地寫語體文／白話文係咪都可以係技巧上有文學性呢？唔洗俾班文言文人係到睇低我地一線呢？於是又從清末白話中提煉出更具文學性既白話文，漸漸成為現代文學既書寫語言。你宜家睇落好多沙石，但係，你話佢地係一套新既、原本用來抗拒當時官語既語言亦都不為過。咦？個故事咁熟既？係啊，咪就係宜家大家想做既事囉。

【佬訊專欄】什麼是香港文學？

至於相當有趣地，一切事情係1949年後就又唔同晒。統一語言，不嬲都係政權手段，你共產黨做，台灣國民黨唔聲唔聲一個唔該去左台灣一樣做。所以中國有普通話，台灣亦有國語。咁香港呢？金文泰都係葉公好龍既粵語使用者黎架，你要唔要稱道下我地偉大既港督？我就唔會啦。如果你真係想獨立，就唔洗買任何殖民者既帳啦。我地要做既只係認清楚香港文學究竟係點樣。有人會覺得香港文學就係用啲造作書面語係到扭黎扭去。哎呀，需知道，語境係好重要既。咁我又想借卡夫卡黎用下。猶太人卡夫卡幾乎用標準化既德語來創作。當卡夫卡用呢種壓逼既語言寫作時，其實就係走進語言體系入面去挑戰佢。當一個被高度壓逼既人不得不使用一種不可能使用既語言去寫作，究竟意味住被馴化定係簡單而言－想玩鳩你官語地位？我可以同你講，當然係後者啦。為了將每一個官方設定既詞語玩出新既意思，我相信無論係五四定香港作家，都用左好大既努力。

如果你覺得係香港寫書面語只不過係對1949年後共黨官語既妥協，或者將成件事諗得太簡單啦。你用粵語讀出黎既書面語，人地都唔承認，根本宜家已經去到一開始就用普通話黎教書寫啦，你仲排斥承認自己母語係粵語、書寫粵音中文既香港作家？宜家如果我地想寫粵語而唔想再向呢個少數文學既路前進，其實都無不可，因為，語境都轉變了，點解唔可以搵條新既路？最緊要條條大道通羅馬，最終我地想講既都係、想建立既都係香港文學。

風吹皇帝褲——孤鳩寒

最後我想用你講乜話個期既封面作個結，因為實在太快人心醒。江記畫左一個面紅既清帝，「風吹皇帝褲」－－孤鳩寒。唔好以為我要企任何一邊，我純粹覺得理解唔到大家爭論緊乜野。其實香港文學一直都無人睇架啦，香港人對於香港文學就係孤鳩寒到唔孤鳩寒架啦。而無人睇既野，都仲要係一個本身抱共同目標既話題底下橫生枝節，我覺得真係相當難睇。