【佬訊專欄】食女三不賣

野葛菜水有三不賣：不夠材料不賣、不夠火候不賣、地方不夠乾淨不賣；「食女」嚟講，都有三不賣。適逢近來文壇（？）又有桃色糾紛，今日講下食女原則，希望大家玩得理性。

首先利申返，題目食女純粹簡稱，佬訊支持性別及性向多元，代入「食仔」道理一樣。另外，很多人留意到最新花生，加上近年其他事件，難免有貴圈真亂的感覺，但如果你希望佬訊爆內部料的話，sor，佬編不是圈子裏的人，無料可以爆。

頭盔戴夠，入正題——食女三不賣，let’s go。

第一，没有自己生活的人，唔食。請注意，題目是「食女」，不是「識女」，食女講求乾手淨腳，不求藕斷絲連，就算你能分開性與愛，不代表對方都得。一天只有24小時，想減低上身機會的話，找一些日常工作較忙、有較多嗜好節目，又或者本身生活較滿足的人較理想。理論上，不計後果的話，已有伴侶的人都是好選擇，至於道德問題，麻煩請教返哲學專家。

第二，日常太多重疊的人，唔食。所謂重疊，可以是工作、朋友圈子，更甚是興趣／嗜好上的同路人。知己難求，做人不要太貪心，有時在一個人身上，難得可以在知性上滿足，心靈或思想上結合，就無謂強求肉體也結合，這才是真正將性與愛分開。工作和朋友圈子也一樣，「喺度食唔好喺度屙」，道理不難明白。

第三，no offence，處事不成熟，精神不穩定的，唔食。都係嗰句，題目是「食女」，不是建立一段長遠、互相扶持、相愛的關係。滿足肉慾是主要目的，不建議無端百事去支撐別人精神的不穩，又或者承受別人靈魂的黑暗面。人總有脆弱的時候，但乘人之危，或乘虛而入，通常無好結果，食女還食女，關係最好維持健康。

如果真有人能滿足上述三個條件，想找佬編做工具人的話，sorry，佬訊只存在於網絡世界，請不要pm，更不要再send dick pic給我們；又如果，有人曾經冒認佬訊食女，請立即pm報告，我們會準備定道歉啟示。

F.

（本文具反諷意味，僅代表作者個人觀點，並不代表「虛詞．無形」及香港文學館的立場。〉