飲江詩兩首

〈卡乎卡卡夫卡〉

——過兆基創意書院睇楊老師《病有我》展覽，記卡乎卡不卡矣有病有我筆記有佢附〈歷劫南音〉一首

我發覺我寫的詩，

都有意思

但沒有意義

除非讀者讀入其中

給它以意義

（予以它以意義）

會唔會係咁呢？

包攬訴訟

你指望誰

你指望啲乜嘢

寫時是有意思的

你發覺你寫了一首诗

就好像你便得了自由

（釋懷？解放?）

這是很有意思的

但沒有意義 除非

你寫的詩教人得到自由

讀入其中的人得到自由

朋友說自己是孤獨患者

她有她的悲傷

就是當我從空中跌下

沒有人可以接住我

我就傳她我寫的一首

每次我打拼就會笑㗎喇

這就是自己設計給自己的裝置:

自己跳落嚟自己把自己接住

一首叫你<歷劫南音之

拖阿妹隻手仔>

我也都是孤獨患者：

沒有人理解你

你就創造一個人吧

你創造一個人你去理解她

你去理解她同時

你也就會理解你自己

(你創造一個人／

讓他來理解你，亦可)

猶如她理解她的同時

她就理解你自己

何者為她何者為你

就這樣被你理解了

（咁唔係好爽咩）

你創造一個機制

當你把你自己拋起

同時創造了一個佢

佢會接住你

你會畀佢接住你

在即将到來的途中

它/祂（？）終究會到來

（唔使再由佢嚟暫代）

接住你

走在街上好似劫後重新

你望我我望你

好耐未感覺到雷同一類

勿以累累

物以類類

人人為我

物以類類

多情未必空餘類

卡夫卡都諗唔到嘅嘢

都畀你諗到

你係咪卡夫卡嚟㗎？

卡夫卡

卡乎卡

卡乎卡（？）

不卡矣（！）

卡夫卡

乜嘢卡住乜嘢呢

冇嘢卡住了！

〈歷劫南音之 拖阿妹隻手仔〉

-- 給薇.薇依依薇

飲江

沖落廁所嘅骨灰

漩渦中徘徊

你知道我愛你

你唔知道我會

我會將自己骨灰

自己倒落去

此乃一裝置

自動輸送帶

我已發明

返轉頭嘅骨牌

量子纏繞

430穿梭機

愛情繞過生死

從這裏

直達那裏

有等於其實

沒有距離

我在鴨寮街示範

感動好多師奶（姐仔）

依次天台跳落嚟

被我一一接過來

有人話係戲法

我自然唔答咀

有人著我重複多幾次

我轉眼又番嚟

你知道我會

你唔知道我會

我會番返嚟

魂兮歸來

歷劫徘徊

将倒落廁所

嘅骨灰重又

倒落坑渠

好讓天邊明月

照住坑渠照住佢

妹妹呀（你係）

天上跌一個落嚟

夕阳西下

最動人嘅裝置

經已設計

最感人嘅結局

我都諗埋

點解

點解

你仲未出世

點解

全部都係

二手時間

二手玫瑰

二手嘅人世

二手嘅古仔

我從不利己

專門利人

前世三生

盡在修行

偷呃拐騙樣樣齊

乜都制

乜都唔制

點解

點解？

重未拖到你隻手仔