【無形・殺出個效應】骨牌效應

骨牌， 鬼佬叫Dominoes，華夏文化產物就係天九，我一聽到即刻手痕，因為小弟喺疫情期間，得到高人指點（蕭翠蓮），學識呢一樣過千年歷史嘅文化遺產暨賭術，喺沉悶嘅中年人生搵到一個燈塔。當然，骨牌效應係另外一樣嘢，離題並冇問題，因為骨牌效應，本身就係將啲唔相關嘅嘢溝埋一齊。

骨牌效應，喺廣東歌詞來講，我立刻諗到陳奕迅二十年前一首歌，《如果這一秒鐘你跟我講你不愛我》，黃偉文填詞，呢一首冇派過台，但呢首Sidecut ，係我初入行時，曾經同填詞人小克研究討論咗一晚。兩條友一路飲酒，一路拆解一件事：就係骨牌效應。

成首歌第一句就係歌名：「如果這一秒鐘你跟我講從未愛我」，然後你會覺得個劇情發展成點？分手？自殺？殺人入喼？少年你太年輕了。第二句鏡頭一轉去返廚房：「還怎聽到這刻咖啡已滾了在叫我」，嗱當年未有Nespresso ，否則唔會有下一句「爐火會給潑熄某種氣體瀰漫散播」，三句歌詞已經三個畫面，第四句已經呼之欲出：「郵差碰巧按鐘瞬間引起強烈爆破」！喂你話唔鍾意我啫，使唔使四句之內玩爆炸呀？好喇首歌仲未去到一半，佢離返個畫外音： 一句一句 越說越遠 直到逆轉世界 一點一點崩解 一級一級一反常態 一塊一塊 越跌越快 像塌下的骨牌 情感干擾世界 情感顛覆世界 來為愛是無涯 下註解 好喇，故事未完繼續第二段：「牆壁炸穿滿天碎片跌於樓下去了」，好似Fight Club咁連屋都炸埋仲想點？一個連鏡好似杜琪峰《大事件》咁落返樓下：「沿街汽車也給瓦礫壓得全部碎了」，然後再嚟個近鏡：「其中有輛裏邊正好有位什麼政要」，有冇咁巧合呀，政要同政棍，只爭一個字，又比佢押到韻，之後一句非常之靚收：「明天國會結果缺少了他投下那票」。

嚴格來講，填詞人用咗八句，就交代晒成件事：就係你唔鍾意我，個骨牌效應會搞到好大鑊，然後尾段歌詞繼續推進：

那次你說你寂寞　(中英談判)

那次你吻我額上　(東德開放了)

那次你引我妒忌　(關西地震)

這次你與我道別

那次你怪我負累　(中東內戰)

原來戰爭會因某君那一票避免了

那次你抱我入睡　(波斯灣政變)

如今炮火卻一寸一寸的蠶蝕世界

那次你怨我乏味　(東歐核試)

如果有天這一切一切都全沒有了

這次世界會末日

全因這一秒鐘你跟我講從未愛我

個故仔就係，我失戀，會令到世界大戰，有時啲嘢，現實更誇張，有條女背叛咗一條仔，之後引發嘅漣漪效應，你又點會估到？香港又點會割讓俾英國？原來當年十九世紀尖沙咀村，有條友叫林維喜，個老婆被英軍調戲，結果一連串嘅骨牌效應，一條漁村變成而家咁樣樣。

希特拉原本係一個畫家，一個素食者，點解會變成一個歷史人物？所有嘢，每個人每個靈魂都係一副骨牌：

或許都 由你 而起

如連鎖般 緊緊扣起

愛惡之間 幹擾了天地

存亡興衰 榮辱悲喜

【無形・殺出個效應】前置詞：瘋狂世界，迸發不絕效應

〈編按：骨牌效應（Domino Effect），指一個很小的初始能量，就可能引發一連串的連鎖反應，即「牽一髮而動全身」，取名自按一定間距排列，然後相繼倒下的多米諾骨牌。除了字面意思，也用來比喻金融或政治系統內的因果關係，暗示事件一定發生或發生的可能性極高。〉