【新年小輯】深水埗過年地攤尋寶

好多人都知，但唔好太大聲：深水埗有好多地攤檔由年三十晚到初四擺賣，亦係一班電影、音樂發燒友尋寶嘅好時機。你會睇到好多檔口有客人深蹲膝蓋，好投入咁去翻閱每張DVD、VCD、藍光、Game、CD、黑膠、LD、書刊。新年期間，深水埗鴨寮街成為大割價嘅影音產品散貨集中地 ，但最吸引地方係檔主並非賣市面上一般新貨品——好多檔主都會搜羅到來自唔同年代嘅產品，趁新年幾日紅假供大家尋寶——尤其係，你完全預計唔到你會搵到幾咁千奇百怪嘅電影。

LD回憶，巿場絕版
由西九龍中心行入去鴨寮街，由第一檔專賣舊式鐳射LD影片同CD嘅檔開始，檔主婆婆放置幾百套LD任君選擇，當中睇到好多香港未出過DVD嘅電影，例如LD有徐克最實驗性嘅武俠片《刀》、美術先鋒區丁平最後執導嘅《狂野生死戀》、劉青雲同黃秋生罕有聯合主演嘅《拆彈專家之寶貝炸彈》、非洲演員歷蘇來港拍攝嘅《香港也瘋狂》、鄭伊健早期主演嘅《男兒當入樽》＆《人魚傳說》、尊尼特普主演嘅《艾活傳》、彼德積遜導演《群屍玩過界》等等。一路走過，仿如返到90年代租借VHS或LD嘅影視專門店一樣，那時好多電影你都想擁有，但年少時負擔唔起高昂嘅價錢，直到VCD或DVD年代嘅來臨先可以再次收藏呢堆電影。但奈何有電影發行商私自刪減電影片段再推出，更有好多連DVD都唔再推出，所以令好多影迷想搵足本版只可以從LD著手。

聽到唔少人同檔主講：「每年都係等你呢檔，每年都唔少未見過嘅嘢」我八卦一問檔主會唔會有倉庫放置，方便過年之後更多人光臨搵到心頭好，檔主話：「冇，我只會每年擺幾日，你搵到就搵啦。」所以想見識嘅朋友，好趁呢幾日盡情搵搵你珍貴嘅電影回憶。

除咗電影以外，CD都算係貨量最多嘅產品，由香港80-90年代嘅歌手，到外國70年代至00後嘅樂隊都有唔少人搜尋。若見到檔口放最當眼嘅鎮檔之寶，只係不斷翻出又翻出嘅譚詠麟、張國榮、梅艷芳、陳百強嘅CD，大概就知佢主要想招徠邊一類口味嘅客人。

黑膠狂熱，地攤驚奇
但見到途人最瘋狂搜集嘅產品，係近十年復興嘅黑膠唱片，係近幾年最多檔口擺賣的。不論港、台、日、美嘅黑膠都有大量棒場客，上至《鳳閣恩仇未了情》、梁醒波《審死官》、達明一派《石頭記》、Beyond《阿拉伯跳舞女郎》下至David Bowie《Heroes》、Queen《Queen II》、Led Zeppelin 《Led Zeppelin IV》、坂本龍一 《Merry Christmas, Mr. Lawrence》、安全地帶《安全地帶V》等等………唔止中年人收集，仲有大批年青人去尋寶。

我歷年見到唔同嘅人收集幾款同樣嘅唱片，所以之前有關於Queen主音Freddie Mercury嘅電影《波希米亞狂想曲：搖滾傳說》票房大收亦不奇怪。網上亦見到唔少音樂群組成員年年都會貼出自己一袋袋嘅戰利品，然後每一張唱片慢慢描述當中嘅歌手背景、製作班底、編曲風格、唱片同自己嘅回憶…每一張唱片佢地總搵到一個故事娓娓道來，每次睇到一篇篇嘅分享，你都會感受到收藏者當下喺地攤尋寶嘅喜悅。



所以每逢年假，好奇想尋覓多年電影、音樂、書刊回憶嘅朋友不妨去深水埗見識一下，可以話年宵以外幾好嘅消遣地方，由下午到晚上都有人擺檔，除咗上述嘅影碟唱片外，林林總總你想像唔到嘅產品都有人賣，絕對足夠你一日時間觀摩各式各樣物品嘅二手市集。