搞軭

（先證清一下，游老闆有邀請我參加咩魚遊戲，但嗰幾日咁啱我要出trip，無計，我哋唔喺有咩唔妥。）

絕於攞到YouTuber個銀牌！首先要多謝各位觀眾大佬，多謝你哋一路以來嘅支持，你哋嘅觀看、like同留言喺我，無論幾辛苦，幾想中途放棄，但都堅持做落去嘅源動力。真喺一段奇妙嘅journey，五年嘅我一定想像唔到而家我所做到嘅嘢：256條片，10.3萬sub，三百四十幾萬小時觀看時間，二千七百萬觀看人次，估唔到一個，一個人做，廣東話嘅Channel可以有咁嘅成就！全靠你哋！

最初喺舊公司做MKT，搵唔到啱心水嘅地方落廣告，老細叫我試吓搵啲網紅，接觸到一個當時話好紅，其實得五萬sub嘅YouTuber ，頂佢個肺，白鴿眼，串過馬撚，名就唔開啦，睇過佢啲片，好普通姐，喺度廢嗡啲「阿媽喺女人」，賴喺型，男人老狗，粉底成尺厚，以為自己明星，依家諗起都仲嬲嬲地。過咗兩日，心諗呢啲人都得，其實我都得？膽粗粗開始做，最初咩都唔識，上網學錄音，學剪片，第一條片仲記得搞咗成個半月先出街，囉囉攣咗成晚得3個views，其中2個仲要喺我自己，一星期之後個數字喺11，其中8個喺我自己，其實都幾洩氣。就停咗，過咗兩個月，有一日，我突然間發覺我一直嘅問題就喺太易放棄，從來無真真正正努力過，讀書又好，感情又好，返工又好，永遠都喺得過且過，條條揈，嗰年我已經廿八，我突然間睇到我將來個樣，就喺街度嗰啲一事無成，怨天尤人，見到垃圾桶都會踢一腳嘅廢老。我決定點都要盡力，要無悔一次，賭馬炒股會輸，但搞YouTuber 只喺需要時間，反正個時間點都無㗎啦，我要用好佢，我要做creator！

每日收工，我就衝返屋企開始剪片，決定一個星期至少要出到一條，頭兩個月講電影條條都喺得百零views，網上睇啲百萬網紅，講自己最初都係咁上下，有啲過咗一兩年，先彈起，但只要彈起咗，個世界就會唔同晒。半年後（嗰時估唔到自己嗰時可以堅持到半年！）升到去平均四百幾、五百，其中有條講梁朝偉嘅有成萬views！開心到瞓唔着，以為自己要紅了，終於夠膽俾send俾 friend同家居企人睇，小學都未畢業嘅老母嘰嘰趷趷，叫我唔好嘥時間，做埋啲無謂嘢，好好專心返工，「唔使OT咩？」。一個識咗十幾年，我當兄弟嘅木咀就係話我符碌，得一百人關注都出到條一萬View嘅片，話咩「剎那光輝唔係永恆」。我send埋俾嗰時我追咗好耐嗰個女仔睇，條八婆已讀不回，有事鍾無艷，當我兵，你哋睇住嚟！我嗰時下定決心一定要威俾佢哋睇。

但邊有咁易，人生不如意事十常八九，我不嬲黑過墨斗，雖然條片過萬view，但只喺多咗七十幾個sub，搞直播（黑歷史），得兩丁友，我仲記得你哋個名呀，@Peterhill2306同@曾偉健xls，雖然你哋唔夠1分鐘就走咗，但都多謝你哋，sorry我甩皮甩骨個樣可能搞到你哋嗰晚吃唔落飯。之後啲片跌翻落幾百view，都唔知Youtube個演算法到底點計。我又停咗一排，嗰時覺得咁樣落去唔係辦法，睇唔到前面有光，日頭返工咁忙，夜晚返到去自己再對住電腦四五個鐘，對眼都就嚟盲。嗰時成個人都好摺，想匿埋。冇晒朋友，連出街去商場，都好淆，覺得自己好似融入唔到，覺得所有人都係主角，得我係一個NPC。有日自己一個坐金巴去咗澳門，返工唔會發達。Fb睇人講，FedEx個老闆當年拎住五千美金去拉斯維加斯，贏咗幾萬，救返就嚟破產嘅公司。點解唔可以喺我，可能我都可以行運一次？結果大家都估到，俾人斬到雞毛鴨血，其實一開始贏㗎，喺衰貪心，唔肯走。不過我都知埞，無借大耳窿，唔係而家可能係柬埔寨打緊電話俾你哋。

頹咗排，有次喺公司開自己啲片睇，俾個同事發現咗，原來佢都有做Youtube，佢開俾我睇，我有睇過啊，原來係你@7upX9upper，佢專門講啲近期網紅趣事懶人包，古早YouTube考古，有成三萬幾sub。佢同我講，而家講電影冇前途㗎啦，我都跌落地揦返拃沙，跟住講，電影out晒啦，老人家先入戲院（佢搞過一個專門評論啲其實根本唔存在嘅電影嘅Channel，不過佢叫我唔好send條link出嚟）佢話依家係遊戲時代，叫我轉跑道講遊戲啦，佢教我一啲SEO。

初初其實我都有啲猶豫，一嚟電影我真係熟同埋鍾意，二嚟打機，當時我已經好多年冇打機，我仲停留喺《GTA3》同《石器時代Online》。佢話唔緊要，慢慢pick up返，多啲睇吓外國YouTuber，將呢啲嘢搬返過嚟（不過要用返自己嘅footage），其實已經夠做，再發展吓自己嘅風格，加啲笑位，用多啲Memes（此處有「Nice」），包我彈起。依家諗返其實好彩，嗰個年頭喺YouTube 用廣東話講game嘅未喺太多，大家都系喺Switch睇人打機為主。

我用一個兩個星期整咗條講《GTA3》故事嘅片，三日就兩萬view，一星期就十萬，啱啱睇返，依家34萬。又一次覺得，my time 終於come！我同自己講，唔好對呢個世界抱有期待，做好自己就得。好快，《GTA》系列到四期個view數就又跌翻落去，同我玩事不過三，懷疑同個演算法八字不合。嗰期我同時做過每週遊戲新聞，平均有3，4K，但做得好辛苦，剪完，休息一日，第日又要開始睇片，睇英文，開始度同寫，一條十分鐘嘅片至少要一萬字嘅稿，星期三要寫完，跟住星期四收工之後通宵搵片嚟剪，一個百萬sub講，每一鏡唔可以長過十三秒，最好喺六秒，十分鐘，即喺100鏡，真喺好辛苦好攰。點解一定要十分鐘？因為個收入爭好遠。

有諗過全職搞，但條數計唔掂，一條片一萬view先得百幾二百蚊，週報式片過兩日就無人會再睇，我嗰時又無廣告。最後都喺決定全力做深度啲嘅片，長期收入點都好啲。但嗰時街度其實深度片好多，特別喺啲熱門game，依家啲「口靚」仔精通兩文三語，我嘅競爭對手喺全球性，而佢哋多資源，大團隊，仲有啲前業界從業人員，點解要睇我？香港又唔似大陸會有人攞一大筆投資channel。有次聽個同事講到「土炮」呢兩粒字，我突然靈光一閃，就好似電影入邊有cult 片，只要搵啱個「利基市場」，「土炮」方式都可以有生存空間，最先諗到嘅喺舊game，原嚟好多人做緊，跟住諗到喺steam上面啲小眾獨立遊戲，特別喺恐怖game，一睇，原嚟都已經好「卷」，我連H game都研究過，但會黃標，無錢收。舊觀眾可能記得，兩年前有半年我又喺停咗，其實嗰時都成三萬sub，但無用，一個月多二、三千外快收入。份爛鬼工又多屎執，全部都喺皇親國戚，個個無料扮四條，幾年冇升職，仲話經濟唔好叫我共渡時艱減人工，你賺得多嗰時又唔見分俾我？真喺好攰，而最攰其實喺「打機」，當一件本身係娛樂放鬆嘅事，成為「工作」，要追kpi ，要做出成績就算本身幾有趣，都會變成一種壓迫，其實明明係同一樣嘢，但當你嘅心態係有求於佢，就咩都唔同晒。

終於有日收到Google邀請參加活動，以為今鋪發達，成晚無瞓，摷返謝師宴件鋪晒塵嘅老西，打埋呔，gel晒頭插住袋上去，點知佢老味，原喺喺sell我買推廣，想搵我著數，即刻起身走。講起呢，之前新聞咪有啲交友app認人，出到嚟，原來喺呃飯吃，sell美容、傳銷嗰啲嘅，其實呢啲好多年㗎啦，我都中過招，啲仆街好狼死，會塞喺門口唔比你走，叫你睇吓佢隻幾廿萬嘅咩「朱古力」Rolex，「跟我搵真銀！」，當我傻仔。我雖然讀書唔叻，但邊個喺人喺鬼我睇得一清二楚，無人可以搵我笨。

總之我就又停咗，曾經覺得有一萬sub已經算有交代，同人講都唔失禮，唔算一事無成，唔喺嘍囉，唔喺廢柴。跟住有一日，有位觀眾pm我「無事丫嗎？」，好開心有人搵我，我個keyboard養咗好耐青苔，傾傾吓，佢話可以講「mod」，CS原本喺喺《half-life》 嘅mod，佢仲玩緊《上古卷軸4》個三國mod，佢話可以玩吓呢啲搵素材，組織成一個「故仔」。我心諗，有啲計wo，佢話愈無喱頭，愈Kai ，愈抽象愈好，「搞軭佢」（bro唔通你係任達華？）。即喺我可以亂咁嚟，唔洗認認真真當另一份工咁樣打機，回應依家個世界嘅方式就喺搞軭佢，打死罷就「認真就輸了。」。

之後就喺《我喺NPC之喺全裸嘅世界用一包火柴可以生存幾耐？》，勢估唔到第一日四百，第二日二千，第三日兩萬，一星期十一萬view！跟住嗰條《我喺NPC之飲啖茶食個包喺罪惡城做chill人》一星期直接上到廿萬。成功嘅滋味真喺「零舍不同」，返工都無咁谷氣，翹住腳，睥翻班碌柒，佢哋完全唔知我有幾多觀眾。

今日除咗同大家分享十萬訂閱獎牌開箱之外，仲有兩件事要公怖，第一件喺，就喺《我喺NPC》即將被改篇成電影，不過好可惜唔會喺廣東話電影，但唔緊要，個ip喺嚟自香港，份光榮喺屬於大家嘅。而第二件事喺，《我喺NPC》接落嚟會喺最後一期，唔關電影事，每個節目，每個Channel都有自己嘅生命周期，每件事總會有完嘅一日。呢一年我成日諗，YouTube 可以做幾多年啊，五年我覺得真喺夠啦，唔洗退休？將來會有越來越多Mr.beast咁樣用幾百萬，幾千萬拍YouTube ，而我呢類型嘅片，好易被AI模仿同取替，特別搞無厘頭、搞抽象，只要俾佢自由，AI比我哋更加冇邏輯，其實你只要有岩嘅prompt，就可以叫AI整到七、八分似嘅《我喺NPC》，可能仲更加搞笑，所以，我覺得係時候停啦。多謝大家睇到呢度，最後，我shark VPN嘅優惠碼係NPC2，大家記住用啊，喺10月底之前有七折優惠。886各位~