牛年究極九GAG

無秩序編輯室 | by  虛詞編輯部 | 2021-02-10

三年又三年,三年又三年,終於到牛年,可以瘋狂食牛......字喇!不過,正所謂禍從口出,牛唔可以亂食,嘢都唔可以亂講,要食,就要食最高級嘅牛字。新一年,送給大家牛九GAG,有爛有唔爛,任君選擇!


1. 牛魔王


榮登文青advanced pack裡的電影《西遊記》,最cliche又最deja vu的台詞之一,除了「我希望係一萬年」之外,怕且都係呢句「娘子,同牛魔王出嚟睇耶穌!」重重複複的不只是牛魔王、般若波羅蜜、時間,又或命運,而是台詞。講到爛,但講完一定有人接,講講下,又癮起,咦?點解我講「又」嘅?



2. 牛氣沖天


踏入牛年,人人都想牛氣沖天,點樣先可以做到?如果你係食肉獸,和牛、肥牛、牛腩、牛筋、牛歡喜⋯⋯成隻牛食晒落肚,胃氣就一定充滿牛氣啦,包保你牛氣沖天。不過食牛唔係咁環保,而且食太多肉對身體都唔好,大家食肉之餘都記得食返多啲菜,均衡飲食,人無事先做到世界冠軍嘛。


3. 牛歡喜


牛歡喜之所以名為牛歡喜,據聞是指公牛看到母牛的生殖器官時,會異常歡喜,這場美麗而含蓄的邂逅,經《低俗喜劇》發揚光大後一發不可收拾,個個淨係記得牛歡喜,有冇尊重過啲公牛先?係咪男女平等先?以後講牛歡喜之餘,拍爛檔都講下牛荔枝,即係牛睪丸呀。



4. 澳牛


澳牛貴為香港特色,「光速餐」早已聞名天下,由入座到埋單,相傳只需600秒。食得慢,身在澳牛是種罪過,不過呢種就係澳牛特色,食客大排長龍都係想要呢啲。食得澳牛,唔可以怯,口窒窒落單,聽畀侍應黑面怒睥,但如果學得成「超光速落單法」,你就係贏家。新年流流,去澳牛畀佢哋開個靚年,練大個膽,氣勢自然來,牛年等住發大財。


5.看牛⋯⋯展覽


牛年除了食牛同食牛⋯⋯字,仲可以看牛⋯⋯展覽應節,買看牛⋯⋯集都可以,啱晒食素嘅人。中大文物館最近舉辦了「辛丑說牛」展覽,展期由即日起去到5月31號。大家可以知道牛牛古時在嘅地位,仲可以欣賞埋相關嘅藝術品,睇完肯定牛氣沖天啦!



6. 牛之歌


牛年,點都要聽返啲同「牛」有關嘅歌,而講到同牛相關,好自然就會諗起Eason唱嘅「我是牛我是牛」。一頭蠻牛,得副蠻力,當然冇用,新一年唔想成為Eason歌中呢隻「阿牛」,咁就要聽埋馬來西亞歌手陳慶祥(阿牛),連隨飲多杯「阿發白咖啡」,開開心心過牛年,最緊要好似周杰倫首歌名咁,牛仔很忙,今年做隻很忙的牛仔,畢竟呢個時勢,有得忙點都係好事。




7. 牛戴一頂帽


爛Gag之鬼一定要玩食字:牛戴帽可以係咩?咪係「牢」囉!相同嘅思維可以延伸落去,賣曬啲羊要用咩代替?都係戴帽嘅牛,因為亡羊補牢⋯⋯(為咗大家新年有更多話題,編輯都好努力!)唔好熄咗個網,我仲有最後一個:點解牛成日話自己幼稚?因為佢怕俾人問:「牛要幾成熟?」(呢個真係10分)


8. 牛郎織女


諗起牛,就會諗起牛郎Roland⋯⋯啊,唔係,係牛郎織女嗰個牛郎。牛郎本身係牽牛星的別稱,亦指牛郎織女中的神話人物。而牛郎點解變成Roland牛郎呢?其中一個出處係指,當時台灣有一間名為「女人樂園」嘅風月場所,入面有唔少男子陪客飲酒,咁啱嗰時上映一部講男妓嘅電影《午夜牛郎》,因此有咗牛郎呢個名。



9. 《看牛集》、《牛》


代表牛的香港作家是誰?如果你講唔出「吳煦斌」呢個名,你真係好打有限。吳煦斌係同也斯、葉輝、李家昇等一輩的香港作家,七十年代出道本土意識萌芽的一代,本身讀生態學,文字非常質樸優美、由當下通往永恒,係香港自然文學中不能繞過的一個名字,但只出過一本小說集《牛》(近年由牛津重版),及一本散文《看牛集》(由香港文學館重版)。讀吳煦斌係十分療癒的,可以讓你重新相信人世中最美好而基本的部分。請因為這樣而原諒我方的植入式廣告。



(圖為編輯部某人猜輸左而要寫呢個植入式廣告PO之場面)


《看牛集》

作者 : 吳煦斌

出版社: 香港文學館有限公司

定價 : HK$100

購買連結:https://bit.ly/2MKlXFU




延伸閱讀

熱門文章

危險的共通體

散文 | by 查映嵐 | 2021-02-17

編輯推介

金庸能否外於「政治正確」?

其他 | by 蕭雲 | 2021-02-22

詩四首:飲江 X 五口

詩歌 | by 飲江、五口 | 2021-02-25

《天堂舞哉足下》小輯

專題小輯 | by 虛詞編輯部 | 2021-02-20

【佬訊專欄】糕糕go

專欄 | by 佬訊 | 2021-02-18

【無形・忘不鳥】鸚鵡

散文 | by 葉曉文 | 2021-02-17