Barbie一路向西遊記

首先，一條直男廢中入場睇Barbie，係幾尷尬，唔係開頭傳說中會遇見好多gay couples ，而係被父母同細路（女），或少男少女包圍，其實，你哋知唔知部戲講乜㗎……

不過，如果真係有細路女睇得明，的確又會係震撼教育，以下係一個直男廢中嘅觀後感，不喜勿狂插，以下嚴重劇透。

1） 批判「虛幻平權天堂」

我覺得第一其實係笑返Barbieland，本來Barbie係好girly girly嘢，但時代一路發展落去，就加咗好多「平權」訊息，好似與時並進，好似係educate緊一眾細路女呢個就係「女性平權天堂」，實際入面假到無倫，而且只係女性心中所謂「理想女性代表」，連「伴侶」阿Ken都係女孩想像嘅男性，只係童年異性玩伴，有友情，但冇愛更冇性，就算有Barbie做埋總統，都只係一種「形式主義平權空想」，冇血冇肉……

就好似伊甸園，一對「金童玉女」（真係blonde）永遠天真無知，永遠「離地」（佢真係拍咗出唻），永遠快快樂樂咁生活……咁其實係誤導咗小朋友（包括男仔），即係等如都有人曾經質疑過好多快樂童話係咪教壞細路咁。

特別在，先前講嘅gay community觀眾，好多都熱愛Barbie，更加愛Ken，即係話，佢哋同樣自細受呢種「平權意識」薰陶，冇發覺Barbie呢位迷人pink lady，只係又一個虛幻童話。

去到現實，Barbie 先知一切唔係咁，父權仍然強橫（不過識得包裝/隱藏），最大鑊係，女仔「平權空想」已經幻滅，男女對立（甚至女人互相敵視競爭）仍然普遍，小朋友大咗面對反差極大世界，女仔可能就變得憤世嫉俗，男仔就好似Ken咁，發現父權嘅「好處」，權力嘅滋味，即係世界權力關係根本冇改變過，只係多咗一重「平權糖衣」而已。

所以佢中心係講緊人類「烏托邦」（btw, 呢個中譯係一流） 同現實嘅對應，理想不能流於假大空，都需要調整，最好狀態係男女都有空間追尋自我，唔會互相壓制，甚至係有真誠溝通，互相勉勵，要成為一個獨一無二嘅Barbie同Ken，而非just any barbie and ken。

所以Barbie喺自我意識覺醒之後，已經係有血有肉有心跳有靈魂嘅人，所以最後選擇去到現實世界生活，佢第一次去現實世界其實係畀「癲喪Barbie」同「變成異類恐慌症」所逼，第二次先係自我選擇。

等如夏娃離開伊甸園，不過，今次唔係畀上帝放逐，係有得揀。

佢見Barbie原創者嗰段，亦係見返佢嘅「上帝」，但呢位「女天主」温柔得多，佢解釋返自我意識及必然伴隨嘅凡人種種痛苦煩惱，無分男女，重識自嘲有逃税被判罪，因為只係凡人甚至係罪人而唔係天主，暗示人有機會犯錯跌倒，但同樣，人有體現愛嘅權利，包括愛情、友情、親情（生育），所有經歷都係獨一無二，呢下高招，已經昇華至哲學層次：何謂之人？何謂之我？

亦解釋咗開頭佢冇性器官，因為只係膠公仔唔係真人，變咗真人梗係有埋塊西，所以最後開開心心去睇婦科，甚至暗示佢可能已經大肚。

但係，導演係女性，當然係主要從女性角度去睇世界，當然仍然有啲位令男性唔太舒服，尤其係已經有平權意識嘅男性…….

2） 誇大「父權現實」

「高高高層」嗰段，明白想表達美國企業仍由男人主導，而「全男班」又只係戲劇誇張表達，但一切只屬美國例子，香港肯定平權好多，無論職位同薪酬，甚至女上司比例可能已經多過男上司。

先撇開當中牽涉有關左翼Woke運動嘅陰謀論 （例如有意無意用#metoo去扭轉企業高層陽盛陰衰局面），呢啲始終純屬陰謀論，單以女上司數目去衡量平權程度，咪又即係barbie做總統，係另一種「形式主義平權」？

明白導演只係嘲諷一下現實，但不能排除有人會被侷限視野。

3） 平權男可有可無

又，拉丁裔媽媽「說教式」控訴現實中女人之苦，講真，已經有平權意識嘅男性又何嘗唔係咁？都話人類痛苦無分男女，但似乎，「平權男」重要加多幾樣：如何平等對待女性之餘又唔會「踩地雷」？例如，女人可肆無忌憚踩男人乜都粗心大意亂Q唻 （其實咪又係stereotype ），只識煮公仔麵同打波打機 （咪又係stereotype ），男人只係幽默反擊下女人係路痴揸車好危險，甚至話自認麻甩嘅女人「可以做地盤」，當你以為女人心靈已經可以強大到平等豁達講得笑，但結果永遠都有可能「踩地雷」，換唻一秒變面……又或者進一步，畀你女人去揸主意去負責任，又話男人廢乜都要女人孭晒，好，我揸主意負責任，又驚你話唔尊重你意見，唔尊重你感受……

其實，講貼地合乎現實嘅平權，不如女人自己先討論一下：你哋究竟想要一個乜嘢嘅平權世界？

唔可能話，既要呈現自己強大，又想男人唔使溝通都明晒你所想，識尊重你，適當時又分担到責任，最好又要化身handy man，最好你攰時又識照顧到你身心。

喂，男人攰時又點？咪會畀人話廢囉！

而平權男喺父權仇女右膠入面會被視為「左膠」、「叛徒」，喺平權女眼中其實又從來冇任何角色，包括呢部戲，入面嘅男性全部係幼稚白痴，連學人大男人嘅過程都低能弱智，較為「正常」已經係Allan，彷彿女性平權從來只係女性靠自己去爭取，唔關男人事……

咁，平權又關我咩事呢？無謂自討沒趣啦。

今時今日面對呢個時代，我真係有少少咁嘅感覺。

4） 反思上世紀女權運動

Btw，Mattel今次識自嘲，高明，但可能都係新product line嘅開始：Ordinary Barbie。

但我認同，女人志願係結婚生子，其實都係自主抉擇 （首尾有呼應）。

其實都有反思上世紀女權主義，嗰種要同男人平起平坐，甚至一較高下要做女超人嘅過硬過激態度，其實係犧牲咗女人天生嘅生育權利，又或選擇平凡嘅權利。

女人志願唔係做總統，唔係做地盤，係做返家庭主婦，唔得嘅咩？