活出「生猛、啜核、抵死」的粵語精神——訪歐陽應霽「食住上」漫畫展
屎尿橫流，但道在便溺。以原始的食慾、市井的粵語，甚至「低俗」的糞便，呈現抵死貼地的藝術，介紹返，呢個係歐陽應霽「Sik6 Zyu6 Soeng5 食住上」漫畫展。
撕下過往「飲食文化研究」之高雅標籤，結合食物、漫畫同粵語，朝不分雅俗之路「食住上」，歐陽應霽自嘲，「好多朋友話我癲咗」，但他偏樂於回歸本我。「將飲食抬高到文化，只會離一般人越來越遠。食本來係人類共通嘅原始慾望，我哋喺進食過程入面，有時壓抑，有時放縱，人性入面嘅貪婪、搶奪、色情、是非顛倒，共冶一爐。呢一次，我都想將我粗俗、蠱惑嗰一面俾其他人睇。」所以這個畫展他返璞歸真，放手實驗，以36句「食」字有關的廣東話俚語，生成一條不雅粗俗，卻激盪生命力的人間道。
齊齊加把口，鬆開語言邊界
飲食、漫畫、粵語，看似大纜都扯唔埋，但再細想原來又有共通點，那就是「炒埋一碟」的活力。歐陽應霽解釋，「漫畫本色，係從九唔搭八嘅聯想中碰撞出新意義；食物亦係雜崩冷，集文化、政治、經濟之大成，由生存需求到人際關係，由檯底到檯面，雜下雜下，就貫穿人類一生；粵語更為精妙，又中又西，雅俗共賞，多字多義仲有九音」。因此，當他想到將三者結合，發現如此一拍即合時，就有種「愛得太遲」，猶如「俾人刮一巴」的晴天霹靂感覺。他立刻攤開一張A5紙，一口氣寫低百幾句與「食」字有關的俚語，這才鬆一口氣，「原來呢堆嘢一直喺我裡面」。隔日，他又立刻去查字典，共查出300多句圍繞食物的俚語，由此啟動這個將為期兩到三年的飲食語言文化檔案計劃。
但計劃第一頭炮，歐陽應霽已自嫌太正經。他指出「粵語最精彩之處，就係生猛、啜核、抵死，表面粗俗，反而可以表達更多。」為了傳神地表現粵語本質，他在創作過程中讓自己放手試驗，用色越豐富越大膽越好，意象越紛雜越錯配越好，例如其中一幅「擔屎唔偷食」，他就抵死地將擔屎畫成耶穌釘十架，將污穢直通聖潔神壇，鬆動觀者想像。在一共36幅畫作中，他更創作了一個充滿歧異的角色，由此開放想像空間。表面看，那是一個食慾旺盛的大隻佬，總是誇張地扭曲身體去進食，但事實上，它是萬事萬物的化身，可以是任何職業、性別，甚至乎是野獸、鬼魂，甚至耶穌都得。歐陽應霽鼓勵觀眾自行理解這個人物，同時邀請任何國籍的觀眾參與到作品之中，以此鬆動語言的界限。在每一幅畫作上，都標上大大個粵語拼音，邀請人有嗰句就講嗰句，「如果吸引到一個外國人，真係試下讀出來，可能呢句就係佢人生第一句廣東話。」
連荷包都係大隻佬化身，只要認住佢個紋身或者金色耳環，就化咗灰都認得佢。
因此，展覽第三部分便是一個聲音裝置，歐陽應霽邀請了九位不同國籍、不曉粵語的人，試跟著粵拼讀出俚語，有人驚奇地讀得準，亦有人讀錯晒，由此探討身分認同的問題。「識講粵語係咪就有香港身份認同？一個人又會唔會因為鍾意香港食物就變成香港人？」像是要帶領觀眾反思食物和語言跟自身的關係。歐陽應霽逐指出，語言最有趣的地方，在於「唔同時代嘅人，對同一句說話會有不同理解。」他渴望這個計劃完成後，可以踩過界探索各地方言，由或者是非官方的語言，找出與當地食物相關的俚語，由此跟其他文化互動。
唔知呢個木架可唔可以通向語言嘅巴別塔呢？今次展覽因為場地問題，所有畫都係用木架展出，反而更加有一種貼地感覺。
歐陽應霽表示曾掙扎用可樂、維他奶定綠寶作為象徵，最後都係決定用可樂，因為可樂梗係食水最深啦！（而筆者隨後表示冇聽過綠寶）
愛要同好多人講，先對得住自己
語言習慣會隨時代演化，對此歐陽應霽並不抗拒，事實上，多年來研究飲食的經驗，甚至讓他深感「要放棄不變嘅神話，唔好再自欺欺人。」他舉例說很多人總懷念媽媽的味道，但只要天氣與地理一改變，食材已經不一樣，更重要是，「就算真係俾你還原又點？都唔係你呀媽整俾你。」
生命有開始有終結，任何東西都會消亡，這次展覽的俚語有新有舊，如「有食唔食，罪大惡極」以及「搵食啫，犯法呀？」是近年才出現的句子，但因其流行程度，地位已跟其他深入民心的俚語睇齊。相反，一些歷史悠久的俚語如「大食有指擬」、「唔食狗肉飲狗湯」，好多人卻聞所未聞。語言推陳出新，經歷興衰乃無可避免，但即便如此，歐陽應霽仍有一種「做得幾多得幾多」的覺悟。「經過呢幾年，人生又走到呢個階段，我開始好迫切去問自己，其實我想做咩？我應該做咩？當我諗到今次呢個計劃，我夠膽講，應該係我先做得最好，我亦係咁去要求自己。因為一樣嘢，如果係你做，唔做咪對唔住自己，對唔住呢個時代？」所以他認為，一個人應該盡力去保留心底所熱愛的事，例如這些粵語，他希望讓更多人去認識，去了解當中的意義，甚至學習當中的精神。「我話廣東話生猛、啜核、抵死，其實我覺得呢個係做人應有嘅quality，我都希望活出呢種精神。」為了完成這批畫作，他搏老命般連續通頂兩晚，一心一意只為完成這個archive project。「呢堆畫有冇人買，要唔要放去art basel都唔緊要，我只係關心我有冇能量去畫，同埋傳播能力有幾高，好希望可以搵到方法推俾更多年輕嘅朋友。」
難怪在展覽場刊中，歐陽應霽以「七彩大龍鳳」形容這批作品。狂野的色彩，又螢光又金屬，其實就是一場糊弄觀眾的大龍鳳，詼諧的外殼下，藏著一種非如此不可的重量。他特意選用acrylic來畫畫，亦正因這是一種可製造層次的媒介。Acrylic的特性，一個字：罯（kam2）。顏料乾後，可以罯上另一層顏色，罯唔到，就落一層白色，就可以再罯上去。如此一層罯一層，正呼應歐陽應霽對歷史及香港的理解。「好多人親眼見到一個城市被rewash過好多好多浸，被塗抹呢一下，反而先係真正嘅現實。所謂藝術，唔應該係風花雪月，而係好多付出同犧牲。」
或許所謂「食住上」，就是要學懂順應時勢，即使身處糞土與污泥濁水之間，還是可以悟出道在便溺的真理，走出自己的一片天。
歐陽應霽「Sik6 Zyu6 Soeng5 食住上」漫畫展
日期：2023年3月14日至4月11日
時間：11:00 am 至 6:00 pm （每逢星期一閉館）
地點：PMQ元創方味道圖書館（B座5樓H504）
費用：免費
延伸閱讀
作者其他文章
