〈鏡中鏡〉其實好難寫

其他 | by  小克 | 2022-01-03

分享吓吖又:呢首〈鏡中鏡〉都算係我寫過最難寫嘅歌詞頭三甲。難在呢個歌名/意象袋住咗好多年想用,終於等到旋律啱用,仲要唱嗰個係受萬千寵愛嘅鏡仔,好邪咁,鏡遇上鏡,所以點都有啲壓力。二來從未寫過呢種曲風,melody快到聽唔到旋律,‭ ‬加上demo是英文,某啲字唱出來介乎似某個音又唔似某個音之間。段落亦唔算分明(初時直頭拆唔開首歌),亦唔係聽開啲流行曲比較melodic嘅旋律句式,起碼比(同是Gareth嘅)〈Master Class〉難搞。好彩後來監製加了最後一段比較慢版嘅melody作結,否則根本唔夠篇幅去講晒姜生要講嘅嘢(我好乖每句都跟足姜生briefing寫㗎,除咗「十歲舊時肥仔」嗰幾句係我私自加嘅,因為我覺得其實好多創傷來自童年經歷)。


另一種難係,消化旋律後,心裡知道要响兩段副歌後段分別諗兩個單字去切合兩種心理狀態,要同韻同調兼要有內容上的層遞,仲要唱出來時順口好唱兼有一定力量(這點最重要,所以一定唔用得合聲韻腳)!所以,「訴」和「吐」已經係我認識嘅常用字之中最適合嘅選擇,典咗幾日差啲就擱筆投降!多謝阿訴同阿吐救咗我。


仲有因為寫慣咗阿Jer,兩年來大概熟習了、也幻想到某啲韻腳他會點處理;但這個是姜濤,咬字唱腔完全唔同,又未合作過,所以無論音韻選擇或內容深淺度都得靠直覺、或對姜生的感覺而作出調整。我知某啲位都幾犖确難唱‭,如條脷有打結sorry恕我功力未夠。


現實的窒息感,自我超度妄念——〈水刑物語〉



關於呢首歌嘅內容解說,有粒姜糖已寫得好好,我就不贅,有興趣可到這裡 @keungtomusic_news 找一篇叫〈「我是濤」一一鏡中鏡感悟〉的文章(順帶謝謝他/她以身心靈方法解讀)。反而,我(又)想講吓我最有興趣嘅創作源頭與由來,不過又要講好耐又要幾千字,因為「鏡中鏡」呢個意象,大概要追溯返廿幾年前……不過係好私人嘅情意結,唔知你有無興趣聽?下次。


最後要多謝唔知係Gareth‭ ‬定邊個(Sorry因為編曲欄有好幾個人),好巧妙咁响曲尾放低十二粒琴音。呢十二個琴音其實來自愛沙尼亞作曲家Arvo Pärt於1978年寫下的名曲〈鏡中鏡〉(spiegel im spiegel),也是我起呢個歌名嘅其中一個源頭。呢首嘢曲式有啲似貝多芬嘅〈月光奏鳴曲〉,但旋律就完全以一個對稱嘅方法去寫,啱晒病態天秤座如我嘅胃口,亦幾係可以响世態炎涼時畀到大眾心靈平靜唔係講笑,誠推大家搵嚟聽聽,真係好似唸緊大日如來咒咁,重新calibrate自己,去返五方中心,識破幻相。


無數電影用過〈spiegel im spiegel〉做配樂,無記錯的話《Gravity》都用過,配以外太空視角下的地球背景簡直妙絕!如有興趣了解〈spiegel im spiegel〉有幾「偏執地對稱」,可於YouTube內搵呢個版本(見第二張圖)。


我不諳樂理所以問過Gareth同監製可唔可以用〈spiegel im spiegel〉嘅方法去處理個結尾當係對前人tribute,最後竟然得到呢十二粒音去終曲……Well,Mirror咁啱十二個人,我覺得呢個收尾太有意思,多謝團隊。


再最後,唔係恭維,係說實話:可能我不嬲粗俗開,姜濤應該係我認識嘅人當中最有禮貌嘅一個,落筆前佢私底下腥咗一段真心說話來,我感覺好似收到紮花咁溫暖(不過唔好再叫我老師,最多我唔叫你姜B),廿二歲人,太得體了(我預咗可能要同佢來回修改好多次,點知無,神奇地一take搞掂);加埋Gareth,太有型了;仲有編監們,太夠薑了;dancers們,part舞太勁了!Sheng & Maggie,黑中太白了(其實我寫詞之前Sheng已經8咗畀我聽個MV會點拍,所以呢個世代做歌已無分次序,神奇到歌詞竟可以跟住MV導演個flow去落筆)!總之,多謝你哋,對我來說,似係過咗一個填詞大關,未算完美,但已盡力了,多謝,新年快樂。


【無形.鏡無限M(irror)+】我在鏡裡看見了新生


(標題為編輯所擬)


延伸閱讀

熱門文章

〈鏡中鏡〉、王家衛與卡爾維諾

其他 | by 小克 | 2022-01-10

編輯推介

詩三首:鄭點 X 無皮蛇 X 李曼旎

詩歌 | by 鄭點、無皮蛇、李曼旎 | 2022-01-21

憶吾師古蒼梧

散文 | by 關夢南 | 2022-01-15

驀然回首科普之路

散文 | by 陳志宏 | 2022-01-09