香港最後一場演唱會：記「林家謙 Summer Blues 演唱會」

未婚妻廣結善緣，女家親友惠賜林家謙 Summer Blues 演唱會門票兩張，星期六、綠區、前排，有幸面聆嘉賓陳奕迅 (Eason Chan) 稱讚林家謙，「係一個好值得大家錫嘅人」。記得 Eason 當時講完「好值得大家錫嘅」，頓咗一頓，原本以爲佢會接歌手、音樂人或者唱作人，深思熟慮、咬文嚼字過後， Eason 斬釘截鐵肯定家謙音樂才華以外，同樣「好值得大家錫」，抵錫嘅，係佢全部人格。

點解正太家謙抵錫到御姐 Serrini 「堂堂一個女明星」，專誠銷假從英國返港，晚晚做佢保姆、幫佢拍痰？兩次加場、三度公開售票、朝十點開賣，下晝兩點前，均搶購一空？首先家謙爲人念舊唔忘本，見於演唱會開場卽獻上其成名少作，〈一人之境〉。原來〈一〉曲雖於 2020 年派臺，樣品〈Another Day〉早於 2014 年告成，並且同爲三十代男歌手，圈中其實有人嫌棄公眾只知自己成名之作、音樂會上甚至拒絕觀眾一片呼聲點唱。生於斯、長於斯嘅山川土壤，家謙亦一往情深，今次演唱〈記得〉一曲，屏幕穿插維多利亞港、葵涌貨櫃碼頭等處日落之餘，又見山頂一段盧吉道；開騷前攝製〈Doodoodoo〉音樂錄影帶，更加走遍中環電梯、上環舊街市、石塘咀電車路，以及西環鐘聲泳棚取景。當晚演唱曲目僅得一首〈飛〉並非廣東歌、事業重心乃至藝術生命仍以香港爲主，對照同日獻唱灣仔會展前輩慨嘆喺北京做個三綫歌手搵錢多十倍，實屬難能可貴。

邀請陳奕迅擔任嘉賓議題，筆者由始至終無意迴避，否則嘻嘻哈哈可也，何必立論？話說陳氏 2005 年回歸香港樂壇技壓群雄之際，家謙時年十四十五，就讀 Eason 母校聖若瑟書院，其時音樂造詣若不足以鑑賞迅音樂，餘生恐怕難有大成；家謙亦承認小學時代經已奉 Eason 爲偶像、升中則送上作品求教，孺慕之情 2020 年終於開花結果、對方委以監製〈致明日的舞〉等新作重任。假如家謙顧忌部分歌迷與兒時偶像政見相左而打消念頭，可謂一不忠於個人成長經歷、二不忠於觀眾視聽享受、三不忠於本港流行音樂發展史 …… 苛求林家謙承受上述一切代爲「守節」，反而有違必須顧及社會脈絡與他人欲求之倫理規範，畢竟林家謙並非錢謙益、香港地縱有柳如是，兩人之間亦無名無分、無以責備。

再者陳奕迅筆者雖無緣結識，但師父家族經營食肆，不時憶述世人都曉肉餅好、鹹蛋好、手撕雞好， Eason 獨愛椒鹽豬扒，惟社會撕裂後識趣戒除堂食，或者爲免譚詠麟灣仔春園街外賣閉門羹而回尷尬？無論師父一家最終決定如何處理昔日情分，均爲艱難抉擇，本人舒服就好、旁人諒解就好，正如夕爺爲家謙譜寫〈某種老朋友〉歌詞：「世上沒人能阻擋細水愛長流／若回憶偶爾活現就前來挑逗／在復原後走得很遠爲何要回頭忍受／但可否當做剩餘無害有情的咀咒／沒有影響此際笑一笑天涼就過秋。」相遇於太平盛世、一氣捲入數千年未有之大變局，箇中人際關係嬗變遠超日常生活經驗所能應付，錯不在各位從未志於領導時代，既非思想家、亦非政治家，升斗小民 ── 所以寬容他人幾分同時、寬容一下自己，就好。

所以陳奕迅告辭、我忖度當晚所有神祕嘉賓身份經已揭曉，燈光重新照亮舞臺乍現男子組合 C AllStar 成員安仔、皇上、釗峰逐一走近家謙，黃偉文 2016 年詞作〈壞與更壞〉此前激活淚腺再度失控，四人合唱〈留下來的人〉，更加驚喜得死而無憾 ── 時代如此、位置如此、曲目如此、歌手如此、臺上嘉賓如此、身邊觀眾如此，如此一期一會， 好天眞好傻如我，尚且知其不可復得；我爲林家謙珍重 C AllStar 如同珍重陳奕迅而感動，亦爲 Serrini 、林夕、 C AllStar 、黃偉文以至演唱會音樂總監何秉舜同樣寵愛我倆喜愛嘅林家謙，感動至今。

林家謙初次進軍紅磡，秣馬厲兵，既備妥新曲〈夏之風物詩〉點題、〈邊一個發明了 Encore〉謝幕，多年幕後創作成果亦取之無禁、用之不竭，毫無年輕歌手缺乏自家作品之憂慮，單論場次更加超越陳奕迅首次紅館騷將近一倍，實力超班。曾經滄海難爲水、除却巫山不是雲，斗膽挪用大先生魯迅「秦之文章，李斯一人」句意，以誌上述可一不可再、「記住比擁有更實在」，香港最後一場演唱會。

【附】林家謙 Summer Blues 演唱會第二場曲目

一）林家謙〈一人之境〉

二）同上〈Doodoodoo〉

三）同上〈夏之風物詩〉

四）同上〈在空中的這一秒〉

五）同上〈下一位前度〉

六）陳凱詠、林家謙〈隔離〉

七）林家謙〈拼命無恙〉

八）林欣彤、林家謙〈沒名字的花〉

九）同上〈懸崖花〉

十）JNYBeatz、林家謙〈靈魂出竅練習曲〉

十一）林家謙〈單數〉

十二）林家謙〈難道喜歡處女座〉

十三）Serrini、林家謙〈Don't Kiss Him〉

十四）同上〈樹木真美〉

十五）同上〈長期浪漫〉

十六）林家謙〈某種老朋友〉

十七）同上〈壞與更壞〉

十八）雷同二友、林家謙〈飛〉

十九）林家謙〈聽風〉

二十）同上〈想創〉

廿一）陳奕迅、林家謙〈致明日的舞〉

廿二）陳奕迅〈今日〉

廿三）林家謙〈特倫斯夢遊仙境〉

廿四）同上〈神奇的糊塗魔藥〉

廿五）同上〈潛水〉

廿六）同上〈Just Carry on〉

廿七）C AllStar、林家謙〈沒明日的恐懼〉

廿八）同上〈留下來的人〉

廿九）林家謙〈時光倒流一句話〉

三十）同上〈記得〉

卅一）同上〈邊一個發明了 Encore〉