【佬訊專欄】講錢傷感情
朋友之間，一牽涉金錢，就有機會有糾紛。
每個人對朋友的定義也不一樣，但如果你以為相熟就不會有問題，那未免太天真。一來，可能只是你當別人是相熟朋友；二來，即使是相熟朋友，未必就可以在金錢上有足夠的溝通。
常見的錢銀糾紛，通常有幾種，以下全部真人經歷。第一種比較直接，是老奉唔俾錢。幫手做嘢又好、二手轉讓舊物又好，一律當你免費。
無錯有時金額不大，幾百而已，但你永遠不知道別人會否介意，值不值得為了少少錢影響友情，諸君要自己衡量。
第二種比較複雜，是唔肯收錢。有次打麻雀，輸幾十蚊，朋友耍手擰頭說少少錢不用計。然後第二次贏一千幾百，他說：「上次都冇計，今次唔係計下話。」
有些人少少數唔收，而且一直不提，你以為他真的無所謂。直到之後有求於你時，才一次過收凸。自此才明白，點解打麻雀一定要找數。
還有第三種，是驚死你搵笨。有時好心幫人買嘢，有些人卻總會疑神疑鬼，覺得你從中抽水賺佢錢。
有些人只是想明碼實價，確保數目正確的，這些帳目分明的人佬編是尊重的；但還有些人，check完單還要嫌你買得貴，有時真會令人吃不消。
經過很多次小糾紛之後，佬編現在開始覺得，其實講錢不傷感情，剛好相反，不講錢才傷感情。能夠光明正大講錢，才是一段成熟的友情。
當然，講錢與否，也可以是個反向指標。如果要說在這些金錢糾紛中學到過甚麼，除了上述的教訓外，就是睇清楚身邊的人。
畢竟連猶大都會背叛耶蘇，數還數，路還路，一切明碼實價，是對雙方的尊重。對，友情不該用金錢衡量，但有時你會發現，原來某些關係，比你想像中的價碼還要低。
延伸閱讀
作者其他文章
