《蜘蛛俠：英雄重生》：拋下救世神話的包袱 尋找真正的同路人

編按：標題由編輯部擬定

兩個半鐘嘅劇情，可以話全無冷場，而且，今次唔係只係一大班人爭奪救世或滅世寶物/神兵，從中又借機大玩集體回憶殺致敬…更準確啲講，唔再係平面化口號式嘅「能力愈大責任愈大」信念，跟住蜂冚咁去犧牲，而係回歸英雄嘅內心掙扎同成長。

真正課題，係講陪伴。

尤其係有人生重大經歷之後，有冇人能夠明白理解嗰種迷失同徬徨，如果欠缺理解，就算畀你日日見面，就算有班人陪伴你左右，實際，亦如陌路。

經過呢幾年，香港人，至少某部分，大概都開始明：原來唔係真係人人都明。

有唔少例子，大家都真係冇辦法再一齊行落去，所謂「同路」，比大家想像中困難好多，尤其係對於「一般人」嚟講……真正明你嘅，可能係同你一樣嘅「異端人」同「過來人」。

有人會比喻佢係周星馳版《西遊記》，從前現在過去了再不來，猶如一個時空旅行者嘅孤獨，就算重遇白晶晶，見面亦不再相識……只有遇上另一個時空旅行者，先會明白彼此……

到某啲位，又有啲似《中華英雄》，因為能力而惹禍，連累身邊人，所以寧願避世而變成「天煞孤星」。

但如果到筆者呢個年紀，可能連呢個階段都過咗，誠如賤輝所講：「我同你呢個年紀，仲有嘢需要人明咩？」「我仲有嘢輸咩？唔緊要啦，贏又好，輸又好，啲野都返唔到嚟㗎啦…都係想為自己做返一件事！」所以，筆者更能夠代入嘅，其實係Punisher，佢最想做嘅，其實係睇實呢條細路，唔好畀佢出事，佢知條細路能力比佢更大更有作為，所以一定陪佢上刀山落油鑊。

由此又想起Logan，嗰個先係中年嘅心境：湊住一個腦退化上一代，面對住現實，身心俱疲，再鋒利嘅爪都有生銹嘅一日……直至遇上下一代同路人，最後就算拼埋條命都要幫佢哋殺出個明天。

留低嘅係一份心意，而唔係負擔。

今次故事另一發人深省之處：幫襯政府都係仆街。

今集除咗Avengers，都牽涉X-men，後生時睇都未完全明Professor X同Magneto嘅爭議，坦白講係唔明Magneto點解唔肯妥協……廿幾年後咪明囉，正因天賦異稟，人類社會唔會明你，而政權更只需「簡單管治」，人民愈愚庸愈平面就愈易管治，所以一定會用盡權力去壓制去打擊佢哋認為有能力危害「簡單管治」嘅人，甚至會囚禁佢哋，希望將佢哋能力轉為己用，前半段其實已經透過「手合會」暗示政權嘅心理操控技巧。

而Jean Grey喺整個Marvel universe戰力排行榜，可以話係天花板級別，佢黑化起嚟，將鳳凰戰力爆發 (有啲似「摩訶無量」)，莫講話Professor X，甚至連Scarlet Witch都未必係對手……而佢最有趣之處，就係佢成日游走於各大陣營之間，一時係X-men，一時又去咗Magneto 嗰邊，黑化起嚟連Magneto 都可以屌打……正因為對一切嘅不信任，被出賣被傷害嘅經歷可以轉化成最強大嘅滅世負能量。

能力愈大責任愈大？對Jean Grey嚟講係負擔甚至係諷刺多於一切……而今次蜘蛛俠嘅最大成長教訓，就係咪再輕信政權，分清邊個先係真正「同路」。

或者都係先天異能同後天異能嘅分別，當你一下子喺社會爬升得太快，未必就會即時分得清忠奸對錯。

人大咗，其實都會喺更高層次去睇呢個複雜世界。

總之，我自行我道。