《奧德賽》：「英雄回歸」，定PTSD？

首先要承認，對於所謂「史詩級鉅製」，我從來並唔太雀躍，N年前嘅《帝國驕雄》、《天國驕雄》可能已經係本人雀躍度最高之作（如果算係史詩級嘅話）。

其實咩係「史詩級」？大場面？大卡士？大歷史或大敍事？千軍萬馬嘅戰爭？抑或正邪最巔峰對決？總覺得有時期望過高，最後有啲言過其實。

不過好歹係一切「史詩級」源頭——名正言順嘅荷馬史詩，細細個又聽過Odyssey大名，知道係西方文學鼻祖，期望總會有，總要捧下場。

都不失預期，成件事都係最原祖嘅「英雄旅程」結構，頭盤就係「有關英雄的傳說」，老實講感覺就係有啲似《中華英雄》初段，即係劍雄聽返世叔伯講「當年你老竇點點點」，跟住就到英雄現真身；中段就如同華夏遠古神話《封神榜》，再加一段《西遊記》，人類戰爭、政治同神怪共冶一爐；尾段話鋒一轉，其實係一個英雄嘅懺悔同自我救贖。

咁作為父權時代遠古英雄神話始祖，世界以至天界梗係圍住一個男人轉，入場前就應有心理準備，不過又咁講，以現代女性主義角度去睇，將佢視為一個「中佬」（甚至已係廢老）嘅打飛機幻想亦不為過……放喺現代，即係一個集團CEO，拋妻棄子兼離職多年後，告別「二奶」迷途知返，竟又得元配親兒甚至下屬擁戴恢復名譽，最後又可逍遙退休去……係咪有啲天方夜譚？

反正我都buy杜汶澤所講，Helen of Troy之所謂「傾國美貌」，實際亦係父權社會為爭奪權力而強加諸一名女子嘅虛銜…父權世界嘅嘢暫且放一旁，不妨從另一角度詮釋。

如果從自我放逐同自我救贖角度去睇，一切係咪入肉啲？尤其喺入面經歷嘅一切遺憾同悔恨，包括忠義兩難、救唔到戰友嘅內疚、犧牲邊個拯救邊個嘅選擇、自我信念敵不過命運作弄嘅崩潰，甚至自己一手促成亂世，對世界一切以至自我嘅質疑，一種無法面對過去嘅懦弱……

其實，所謂Odyssey，所謂「英雄旅程」，實際係對自己最深刻嘅靈魂拷問。

有人或者會迷失於悔恨，永遠沉淪喺半途，借迷幻靡靡之音逃避，恨錯難返。

回家，代表回歸自我本性，回歸初心。

與其話「英雄旅程」，其實又更似一個士兵嘅PTSD多啲，尤其喺過程中曾經或曾經目睹對手無寸鐵平民施暴嘅武裝人員。

當中對「木馬屠城」嘅仔細描述，其實先係導演最想表達嘅意思。

亦令人諗起，「楚河漢界」中，最後漢違反和平協議向人背脊放箭，令歷史返唔到轉頭。

宙斯律法，由此打破。

之後世世代代皆如此，包括現代，不過角色逆轉，西方城破。

由Oppenheimer到Odyssey，其實都係講緊打破咗人性一啲底線嘅自我拷問。

不過電影還電影，現實係咪咁？

最近讀到，某前守衛於某国新疆集中營（又名「再教育營」）之供述，猶如南京日軍士兵自述，相信係真誠懺悔。

都係嗰句，只有真正有良知嘅人，先會進行自我拷問，而且係每一日。

世界依然太複雜，難一言概之。