雞蛋

大時大節Peter一定有花加吃好西，IG一定po兩個大頭相。以前班friend，個個都話好羨慕佢。但大家出嚟做嘢之後，Tracy再聽到人哋話佢幸福嗰陣，自己都覺得有啲哽耳。好似當世界大咗，有愛瑪仕、米芝蓮、ritz carlton、保時捷之後，幸福嘅定義亦都隨之改變咗，你好難再被日常生活感動，你越嚟越需要去模仿明星、網紅同身邊富有嘅朋友去畀自己融入社會，對抗孤獨。你需要變得脆弱，先可以成為某一個群體嘅一份子。我哋活喺一個它的自我世界入面，呢度得一個世界，所有事都以這個世界為標準，其他全部都可以係錯或者假 。

除低套護士服。唧啲hand cream出嚟。每次返完夜更Tracy就會覺得個人好dry，朋友話女人唔keep好易老。返工時間地鐵好迫，Cap帽盡量壓低，太光。尋晚有個patient，啱啱三十出頭，靚女嚟，喺投資銀行做，屋企又有錢，完全係人生勝利組，但突然就走咗，腦入面個癌因為生蛇，爆咗。半個鐘前兩個人仲有講有笑有，半個鐘個人就無咗。佢同Tracy講，等佢好返，佢要去南極，去爬珠穆朗瑪峰，要同各種膚色嘅男人拍拖，佢未玩夠。

今日唔吃B餐，嗌咗A，凍啡走甜。佢鍾意茶餐廳咖啡嗰隻味，不過佢無同人講過。Peter WhatsApp問佢返到去未，攰唔攰，「啱啱到，準備沖涼。」。坐完碗通粉同個炒蛋，Tracy含住飲管先開始碌IG Story，朋友喺海邊晒腳，或者喺咩會議同咩名人定CEO合照，都係嗰啲，碌咗成分鐘，先有個得意啲嘅，一個唔係好熟嘅大學同學喺度直播捉姦在床。Tracy cap圖send俾啲friend睇，本身仲眼矇朦嘅香港人即刻全部醒晒，好快各大網絡平台都開始熱議呢單嘢，花生價格再度飆升。相關人仕所有網絡上留低過嘅腳毛，現實生活中記錄在案嘅事都被人摷垃圾桶咁摷返出嚟，擺喺陽光下面曬。呢度嘅人最鍾意睇人仆街。

喺超市買咗啲雞蛋同牛奶，同保安打招呼。翻到屋企人好易失憶，好多嘢會消失。一再確認個水掣擰實，邊敷mask，邊覆message，好多N年無聯絡嘅人走嚟八卦。大家不停lmao同笑喊Emoji，大家唔再識個醜字點寫。就算隔住個mon Tracy都feel到對面班人個衰樣。

Tracy覺得自己好似後生翻。但擺低手機，如果呢件事發生喺自己身上，佢會點做，佢有無咁嘅勇氣？啱啱因為潛入網絡世界而消失嘅檔房，又再次包圍住佢。

想瞓覺，但喺有舊好細好細嘅石頭喺個LV袋入面，砸住佢心口。佢並無內疚，只有深思熟慮過嘅事先值得內疚。陽光從窗簾嘅罅中間吐出來，眼罩好熱。冬天越嚟越短。腦入面有好多現實中從未發生過，但並非夢嘅場景上演緊，直到你嘅意志終於放棄控制，你先可以入睡。

Tracy聽到Peter開門入嚟，佢繼續扮瞓。佢聽到拆開膠袋嘅聲，聽到奶茶蓋俾飲管篤穿嘅聲，聽到登入Netflix嘅聲。上個星期，佢哋呢個時間身處東京，中午佢哋喺自由之丘排隊買麵包，網上話呢個麵包師師傅喺法國都好出名，佢IG個story，勁多人like，但Peter就黑晒面。夜晚佢哋喺渋谷求其食咗間拉麵，Peter飲晒成碗湯，好肥。但佢覺得一啲都唔好食，佢到而家都諗住自己做攻略搵嗰間雞白湯，但Peter話佢唔想再排隊。

捱到個肚咕咕叫，Tracy先起身。Peter喺度打緊《Elden Ring》，唔知第幾週目。「我買咗嘢俾你食啊，你自己叮熱佢啊。」。巨大嘅角色反覆衝過來，微波爐裡面啲叉燒不斷旋轉，人眼睇唔到嘅物理學喺到作用緊，無時無刻。

捧住盒飯，喺梳化坐低。Peter眼尾都冇睄過嚟。殺戮太有趣，現實到處都喺掣肘。Threads被春天白霧墜昏城嘅相洗板。一個移咗民，幾個月都未覆WhatsApp嘅前閨蜜突然搵佢，原嚟係嚟問出軌單嘢。依家到Tracy 唔想覆。「我唔想接受你啲負能量」佔據晚間新聞嘅一條誤入城市嘅鯨魚報道。只要保持上網，每日外面都有無限事情在發生，讓你感到匆忙，然後空虛。你會覺得自己喺一個垃圾崗。「冲涼！」Peter講完就起身，就地剝咗件衫，跨過Tracy，行咗入廁所。下年佢哋就結婚，呢個月佢哋已經開始供樓，從中學到而家，十年。佢哋按步就班，同一部分同齡人一樣，喺人生每一個階段做最啱嘅事，同打卡一樣。

隔籬屋今晚又搵咗班friend 上嚟開party，同咁都瞓得着嘅Peter一樣嘈喧巴閉，條肥仔呢兩年開始扯鼻鼾，搞到Tracy瞓唔好，精神衰弱。明明喺球場上嘅如風少年，霎眼間變咗頭死豬。㩒開YouTube，咩都想睇，但又對咩都無耐性，2.0X速度，都唔知自己睇緊乜，但唔睇，又會喺首頁日日提你。咁多年儲落嚟成千個訂閱頻道，如果「取關」就好似抹走咗自己嘅過去。因為時間存在，我所以係我。

*

今日休息，落樓吃早餐，吃同尋日晏就一模一樣嘅嘢。Peter出門口前，提佢多次，後日返東頭邨吃飯，傾訂酒席嗰啲嘢。新聞話條鯨魚死咗，有人建議拎條屍做標本，吸引遊客。隔籬枱嗰個人喺咁舀啲糖入杯奶茶。出軌嗰位，宣佈同老婆復合。

返到去，攤落床，擘開眼，已經係下晝三點。唧啲hand cream出嚟， 終於有mood聽歌，藍芽連上Marcel ，聽佢最中意嘅彭玲，唔知邊度嚟嘅雨，顛倒咗日夜。擺低部手機喺自己會醒唔起去咗邊嘅，用膠囊機冲一杯Latte落Mary自己拉嘅陶瓷馬克杯，襯熱雙手棒住，行去窗邊，忍受樓酒樓嘅油煙味，故作姿態，對任手指粗嘅天空打掛，話畀自己知，呢一刻我自由，半首歌嘅時間。擰返轉頭嘅瞬間，呢間月租一萬六千七嘅studio同窗出面另外嗰層樓嘅外牆一模一樣，一切都一目瞭然，一切只有咁少，一切都已有名字，梳化、廚具、餐枱、吸塵機，不容任何更改。

Peter今晚約咗啲佢家姐。Tracy要自己搞掂。打開雪櫃，拎出三隻雞蛋。敲向碗邊前，佢覺得手中嘅重量好似比平時重，佢唔敢郁，佢凝住隻雞蛋入面有骨頭。