【教育侏羅紀】DSE取消中文聆聽和說話卷,=/=「消滅廣東話」

教育侏羅紀 | by  葉一知 | 2021-09-23

DSE話取消聆聽和說話兩份卷,即刻引起「消滅廣東話」嘅疑慮,反應好大,可以睇到,依家個政府嘅公信力係零,你做乜嘢都冇人信,都覺得你另有大陰謀,當然呢個都係自己攞嚟。

但取消兩份卷,係咪等於消滅廣東話,係另一個值得探討嘅問題。我當然係好撐廣東話,愛好中文的都知道,普通話即北方話係一種退化嘅語言,聲調少,剩係冇咗貼近古音嘅入聲已係最大問題。之但係話分兩頭,一份本來係考本族語(native speaker)嘅卷,我就唔係好明有幾大需要去考聆聽和說話。根本新高中嘅中文課程,係當中文係second language咁考,我一直覺得好戇居。

好似去英國讀書,英文科注重嘅一定係英國文學,因為有英國文學根底嘅人,修辭好,寫同講都唔會差。中文其實一樣,如果真係想提升中文能力,係一定要教多啲文言文,中文好嘅人一定係有文言文根底,佢哋寫嘢同演說都會較好,而唔需要額外訓練聆聽和說話(演說則係另一種獨立於語言嘅訓練,講自信多於語文),因為那些素材都是日常生活,點解要搵份卷特登作啲有陷阱嘅題目去考學生?

大家唔好忘記,喺英殖時代,中文就只有閱讀和寫作兩份卷,讀經典文學和文言文,再加寫作,已經係邁向良好中文嘅道路。而嗰陣時,廣東話不單冇被消滅,而且非常強勢,粵劇、粵語長片、港產片、廣東歌、電視劇甚至連環圖,全部都係歷史高峰,並外銷到全世界,也成為香港深厚嘅文化根底,是被挪用至今嘅「老本」。

好明顯,冇聆聽和說話卷,係唔會削弱廣東語,一來其實呢兩份卷係可以揀普通話答的,二來,只要你仍然堅持用廣東話去生活,拒絕普通話,廣東話靠佢嘅頑強生命力和深厚、源自盛世流行文化而累積嘅根底,係一定唔會被消滅。

依家最大嘅問題係︰

.好多學校由小學已拒絕廣東話,普教小普教中連考聆聽和說話都係用普通話,直至DSE課程才轉返做廣東話;
.有啲學校強迫學生一定要講普通話;
.好多家長覺得用普通話係更好,不斷鼓吹學生自小學普通話,可以的話放棄廣東話,並迷信普教中等於中文好;
.好多本土歌手都轉投大陸市場,唱國語歌,放棄廣東歌;
.電影就變晒合拍片,放棄抵死嘅粵語對白,用普通話去寫對白然後用粵語讀返出嚟做配音;
.電視台不斷播大陸劇,結果又係用粵語讀普通話寫的對白,失去粵語嘅神韻;
.服務員見到遊客甚至香港人就主動用普通話(你去日本,人哋永遠堅持講日文)

以上種種行為(應該還有更多吧),先係消滅廣東話嘅元兇。中文卷由DSE之前開始已有聆聽和說話,但以上種種現象也同時發生,可以話,香港人放棄廣東話,一向係屈服於市場多於其他因素。

〈編按︰原文發表於葉一知個人臉書,承蒙作者惠允轉載。本文內容僅代表作者個人觀點,並不代表「虛詞.無形」及香港文學館的立場。〉


延伸閱讀

熱門文章

編輯推介

台北之旅藝術有感

藝評 | by 胡夢未 | 2024-03-18

《新活日常》小輯

專題小輯 | by 虛詞編輯部 | 2024-03-14

殖民地的語言

散文 | by 王崢 | 2024-03-08

驚蟄

小說 | by 盧卓倫 | 2024-03-08

《無邪之境》小輯

專題小輯 | by 虛詞編輯部 | 2024-03-08

著名電影史學家及理論家David Bordwell逝世

報導 | by 虛詞編輯部 | 2024-03-05