新年十大賭片,缺一不可

其他 | by  虛詞編輯部 | 2020-01-23

大年初一。


你穿上紅色的新衣,照照鏡,你再次確認黑色才適合你。然而打開門,你試圖合群,生硬地說了幾句恭喜發財,(差點就説了光復香港)。親戚讚你肥咗又瘦咗,你禮貌而客氣地點頭微笑。交換過幾封利是、把同一罐藍罐曲奇換來換去之後,終於,你在已經逼爆了的客廳找到一個角落,你撥走地上的瓜子殼,坐下來,莫名地感到寂寞。


這時候,突然有人說:不如,打牌啦?


這是如此具爆發力的一句話,你感到整間屋的人都沸騰起來,包括你。你告訴自己,Einmal ist keinmal,只賭一次不算數,這是資本流動的機會,這是讓社會資源重新洗牌的機會,這是對抗這個吃人體制的唯一機會!然而,賭徒的反應是如此迅速,客廳早已一分為二,一邊是麻雀,一邊是啤牌,你一時失了方向,在電光火石之間,不知誰人把遙控塞了給你,說:求其開套賭片睇下啦!再度陷入兩難的你想,Oh no,揀邊套好?


1. 逢賭必贏、英雄本色、香港人報仇之選:《賭神》


沒有選擇的餘地,這是賭片中的the first and the only one,而周潤發就是賭神的理型,其餘一切只是理型的臨摹及複製。在1989年紙醉金迷的香港,賭神也是香港人的理型,人人崇尚英雄本色,相信showhand的攬炒式豪賭,為咗報仇要賭身家,賭身分,賭手賭腳賭命,攬炒背後體現背水一戰的必勝決心,香港人,從來都要贏。


但,不知何時開始,這種盜亦有道,有恩報恩、有仇必報的港產片買少見少,一如發哥呢種可以喺「人」同「神」之間來去自如嘅演員,不是少,是只得發哥一個。向全天下梳All back油頭最有型的發哥致敬,今年全盒不要放朱古力金幣,我們放賭神朱古力,要離家拜年的朋友記得先拿幾塊徬身,賭錢時從口袋中拿出一片,然後優雅地一口吃掉,絕對能給對手一個下馬威。


B9E9A075-1603-4664-B249-A4DA23DAB1CB

報仇雪恨後那塊苦中帶甜的賭神朱古力,腦中響起的竟然不是賭神出場BGM,而是《當年情》。


賭神玉戒指,賭神開運(同千人)聖物。


2. 賭場初哥、情迷綺夢、特異功能人士之選: 《賭聖》


二次創作中的高手高手高高手,非《賭聖》莫屬。這是一套惡搞《賭神》的電影,卻打破香港票房紀錄,更讓周星馳上神檯,由星仔變成星爺,從此星爺電影,亦成為賀年必備。集顛覆與獵奇於一身,賭聖以特異功能打破賭神的原廠設定,沒有高超的賭術,只有瘋狂的「晒冷」,盲拳打死老師傅。嚴格來說,特異功能即係出千,不過,香港的賭片不講求寫實,好看的是心理戰,賭桌上的爾虞我詐、互相猜度、高潮起伏,彷如人生。


又話說,這是劉鎮偉與周星馳的首次合作,五年後,他們拍出了一生所愛《西遊記》與《回魂夜》。


IMG_3508

三叔中伏後表示:原來Gel賭神頭係咁臭嘅,建議初二可以洗頭先好Gel。


兩大必睇位:

有「先天性失控症」,失控喪un Popo的三叔。


IMG_3514

特異功能的最高境界,催眠:餵 「綺夢」(粒癦)食龍蝦。

(也是借代法的最高境界。)


3. 最好笑、最疊馬、戒粗口人士之選:《賭俠》


骰子一擲不會消弭偶然,除非有兩個特異功能高手同時發功,結果只會是一個,就是一粒點都冇,歸於虛無。



可能你會覺得,咁都得?冇錯,就係咁都得,永續賭片傳奇,《賭俠》將《賭神》和《賭聖》炒埋一碟,集齊周潤發、劉德華、周星馳,笑料都多咗個double,笑話大爆炸彷如新年劈嚦啪啦嘅爆仗,絕對係新年必睇,我最喜愛賭片,毋需多講,去圖。


7AFF43F8-C0CE-46D3-9ED3-0036C57E77BE

昨日,我菲律賓......唉,唔打了,識背啦。


BD42A700-BAA2-43D0-B17B-FCA30A182451

各位觀眾,游移在能指和所指之間的五條煙!


好想瘋狂cap圖,無奈《賭俠》Gag位太多,「10蚊想贏2500萬」、「已經係公海」、「未散功就講粗口」等等等等,無法盡錄,當然,如果遇到藍絲親戚......即管破功吧。


4. 浪子、貼地、懷念亞視之選:《賭俠1999》


當你決定在Youtube輸入「賭俠」,準備笑到癩屎時,你無故感到一陣寒意,你抬頭,發現你那個97年出生,剛剛輸了舖十三么的表弟,竟一頭灰髮,彷彿是個有故事的人,你猶豫了,想起了《賭俠1999》。賭神浪潮過去,97過後,沒有意氣風發的賭「俠」,只有浪跡江湖的老千。電影中也再沒有大型賭場,只有民間賭檔,玩下賭馬、射龍門和賭波。這部電影很悲,但也有初露鋒芒,被視為笑片接班人之一的張家輝,非常有新鮮感,讓電影在悲情與On9之間游離,別樹一格。


不只亞視,連無線都不再永恆,悲。


輸了家庭、時間、幸福,但贏了朱茵。Shit,更悲。


5. 王晶都有感動位,動人之選:《至尊無上》


1989開始出現的「至尊」系列,是老千的故事,當時仍是可以在便利店食煙的年代,擔住口煙做爛仔的劉華真係靚仔到可以代表香港的盛世;而同佢對手戲的譚詠麟,則竟然可以扮到半個張國榮咁。遙想當年,CHEAP精王晶都只不過是CHEAP,仲可以拍到兄弟情;譚詠麟都只不過是官仔骨骨出賣人,你係仲未忍心撕爛其黑膠唱片。


《至尊無上》拍出老千兄弟情,死守浪子不泊岸,無產者不佔有,其中有階級悲歌,馬克思都要流淚。譚詠麟成日想做番正行,話老千唔可以做一世;劉華永遠為兄弟犧牲,無論如何想留番在香港,話如果係得既就邊度都搵到食,唔想講英文。本土意識咪呢D囉。在鬼佬面前,中國人唔衰得,在電影裡是喜劇橋段,只係迫向華勝講下英文(有配音);點知後來食大中華飯做護旗手,會墮落到如斯田地。


傳說中的劉華神眼…… 以為係王家衛手筆……


如果譚伯,扮張國榮扮得更似,唔好留響度獻世,咪好囉!


6. 中伏!愈大鑊愈快樂之選:《至尊計狀元才》


老千片開出新巿道,1990年的《至尊計狀元才》反轉《至尊無上》的悲情格局,係徹頭徹尾的輕浮笑片,大玩所有賭片前作元素,阿叻扮賭神,劉華扮龍五。雖然呢齣戲掛的是向華勝、黃泰星導演,王晶只是監製,但其實比《至尊無上》更為王晶本色:一如《情聖》裡面全沒有愛情,《至尊計狀元才》好難算是賭片,鳩流流成套到最尾才有一個反高潮賭局橋。老千,已經超越咗賭技,而昇華為一種生活態度。當年被千咗嘅人(不是你,是我),反而租碟睇咗兩次!在後八九的悲情格局中,《至尊計狀元才》以獎勵後生廢青的笑片方式,高收千二萬,在全年票房中排名第九。


片中有劉德華被槍指著頭受掌摑的場面……據說影圈黑社會當道時,劉華真係有被人用槍指住頭迫佢拍戲……


全片驚喜是初出茅籚卜卜脆的嫩口黃秋生,飾演小反派楊星渾身是戲,大量加插自由發揮之小節,好戲過全片所有人加埋。


黃秋生

猶如黑暗中的螢火蟲一樣耀眼,壓晒所有場,秋生哥!


7. 悲情冚包散,極唔老黎之選:《至尊無上II之永霸天下》


可能係因為《至尊計狀元才》行喜劇路線,作為「至尊三寶」的壓軸作《至尊無上II之永霸天下》,杜琪峰導演,有王傑加入演出——王傑永恒之滄桑可稱為不能被擊倒(或者佢一早都已經永恆地被擊倒了),成就一齣悲情到震的賭片。


杜琪峰的信物(賭神玉牌)主題、殘缺主題、命運主題、暗黑風格,在本片中發揮到淋漓盡致。死、死、死,係咁死。劉紹銘要跛就算了,王傑當然要被真爆樽,竟然要劉華盲、蒙眼演戲,都算絕。蒙太奇好有末世FEEL,巨洋蔥片。


劉華無眼,演技大挑戰。


pasted image 0

《天若有情》復活!嗰幾年劉華真係揸左好多轉電單車。


8. Hea下Hea下、往事只能回味之選 :《千王之王2000》


比《至尊無上》更洋蔥的是,四圈過後,你打開櫃桶,數數裡面的籌碼,發現自己無贏又無輸,剛才發生的好比是一場夢。你忍不住説,原來沒有醒不了的綺夢,仍未揀掂睇邊套戲嘅你,諗起《千王之王2000》呢套爛片。


冇錯,呢套係星爺唯一Hea演嘅電影,星爺同張家輝嘅對手戲,完全就係兩條友喺度表演特異功能——隔空演戲。你望住演得如斯吃力的張家輝,那堆笑話,你笑唔出。你在電影裡見證了王晶的賭片時代結束,亦明白賭的核心,最終都係錢。王晶後來喺節目中爆料,話當年星爺客串7日,每日袋過百萬片酬,為何二人不歡而散?是因為星爺Hea演,片太爛,還是錢作怪?但其實,星爺當年幫王晶賺到嘅錢,多到發發聲啦。《千王之王2000》之後,星爺再冇接拍其他導演嘅戲,大時代結束,你輕輕嘆了口氣,覺得一切不來也不去,彷如幾天的新年假期。


有張家輝做主角,但始終是一套爛片。


造型有D似《食神》。


9. 爛牌成經典,千王之王過後逆境自強之選:《嚦咕嚦咕新年財》


打麻雀,唔係個個都好似拍戲咁好摸手,廣東牌尤其講守牌,所以杜琪峰《嚦咕嚦咕新年財》真係一套好好的麻雀入門教材。賭片一向係度超現實的靚牌橋,本片則應該係賭片史上最多爛牌的一套電影,仲教你如何輸得少更開心,已成崩壞香港每年必談的賭片經典。


劉華已經不再飆風,成為公民教育大使,本片金句大家都識背,不用多講:


公民教育片才會將人物放到咁中央架咋。


不過梁詠琪受傷後的毒咒大家可能就不容易記住了。大家都係記住佢的巨胸造型比較多。

「鋪鋪摸爛牌,要嗰隻冇嗰隻,出沖,包大牌,叫糊叫死糊,求上不得,求碰不能,一鋪清袋,永無翻本之日」——讀一次都腳震呀……


光復香港未到,時代革命未完,煲底之約實現之前,爛牌都要俾心機打,不要放棄每一個機會,輸少當贏,正所謂,「搏佢三番!」


10. 2020鼠年最具賀年氣氛賭片之選:《賭俠大戰拉斯維加斯》


睇戲原因只有一個,單係睇荷蘭叻成面屎已經非常喜慶,我真係恭喜你呀。



同場加映:

螢幕快照 2020-01-23 下午7

荷蘭叻幫萬梓良吸完蛇毒之後變咗孖潤腸,劉華表示:「我唔知,我睇唔到。」


延伸閱讀

年花與寂靜

散文 | by 洪曉嫻 | 2020-01-24

新春吃到與吃不到的意頭

散文 | by 謝傲霜 | 2020-01-24

年宵是一首medley

其他 | by 鄭美姿 | 2020-01-24

熱門文章

編輯推介

【虛詞.酒店有落】貝殼

小說 | by 盧真瑜 | 2020-02-21

【時代抗疫】瘟疫

其他 | by 跂之 | 2020-02-23

《上流寄生族》小輯

專題小輯 | by 查映嵐、凌志誠、麥曦茵 | 2020-02-20

大規模Domestic Violence

散文 | by 白水 | 2020-02-18